Ps 48
Ps 48
Ps 48.1
victori filiorum Core canticum
Ps 48.2
audite hoc omnes populi auribus percipite universi habitatores occidentis
Ps 48.3
tam filii Adam quam filii singulorum simul dives et pauper
Ps 48.4
os meum loquitur sapientias et meditatio cordis mei prudentias
Ps 48.5
inclino ad parabulam aurem meam aperiam in cithara enigma meum
Ps 48.6
quare timebo in diebus mali iniquitas calcanei mei circumdabit me
Ps 48.7
qui fiduciam habent in fortitudine sua et in multitudine divitiarum suarum superbiunt
Ps 48.8
fratrem redimens non redimet vir nec dabit Deo propitiationem pro eo
Ps 48.9
neque pretium redemptionis animae eorum sed quiescet in saeculo
Ps 48.10
et vivet ultra in sempiternum
Ps 48.11
et non videbit interitum cum viderit sapientes morientes simul insipiens et indoctus peribunt et derelinquent alienis divitias suas
Ps 48.12
interiora sua domus suas in saeculo tabernacula sua in generatione et generatione vocaverunt nominibus suis terras suas
Ps 48.13
et homo in honore non commorabitur adsimilatus est iumentis et exaequatus est
Ps 48.14
haec est via insipientiae eorum et post eos iuxta os eorum current semper
Ps 48.15
quasi grex in inferno positi sunt mors pascet eos et subicient eos recti in matutino et figura eorum conteretur in inferno post habitaculum suum
Ps 48.16
verumtamen Deus redimet animam meam de manu inferi cum adsumpserit me semper
Ps 48.17
noli timere cum ditatus fuerit vir cum multiplicata fuerit gloria domus eius
Ps 48.18
neque enim moriens tollet omnia nec descendet post eum gloria eius
Ps 48.19
quia animae suae in vita sua benedicet laudabunt inquient te cum benefeceris tibi
Ps 48.20
intrabit usque ad generationes patrum suorum usque ad finem non videbunt lucem
Ps 48.21
homo cum in honore esset non intellexit conparavit se iumentis et silebitur
