Ps 49
Ps 49
Ps 49.1
canticum Asaph fortis Deus Dominus locutus est et vocavit terram ab ortu solis usque ad occasum eius
Ps 49.2
de Sion perfecta decore Deus apparuit
Ps 49.3
veniet Deus noster et non tacebit ignis coram eo vorabit et in circuitu eius tempestas valida
Ps 49.4
vocabit caelum desursum et terram ut iudicet populum suum
Ps 49.5
congregate mihi sanctos meos qui feriunt pactum meum in sacrificio
Ps 49.6
et adnuntiabunt caeli iustitiam eius quia Deus iudex est semper
Ps 49.7
audi popule meus et loquar Israhel et contestabor te Deus Deus tuus ego sum
Ps 49.8
non propter victimas tuas arguam te et holocaustomata tua coram me sunt semper
Ps 49.9
non accipiam de domo tua vitulum neque de gregibus tuis hircos
Ps 49.10
mea sunt enim omnia animalia silvarum pecudes in montibus milium
Ps 49.11
scio omnes aves montium et universitas agri mecum est
Ps 49.12
si esuriero non dicam tibi meus est enim orbis et plenitudo eius
Ps 49.13
numquid comedam carnem taurorum aut sanguinem hircorum bibam
Ps 49.14
immola Deo laudem et redde Altissimo vota tua
Ps 49.15
et invoca me in die tribulationis liberabo te et glorificabis me
Ps 49.16
impio autem dixit Deus quid tibi est cum narratione praeceptorum meorum et ut adsumas pactum meum in ore tuo
Ps 49.17
qui odisti disciplinam et proiecisti verba mea post te
Ps 49.18
si videbas furem consentiebas ei et cum adulteris erat pars tua
Ps 49.19
os tuum dimisisti ad malitiam et lingua tua concinnavit dolum
Ps 49.20
sedens adversum fratrem tuum loquebaris et adversum filium matris tuae fabricabaris obprobrium
Ps 49.21
haec fecisti et tacui existimasti futurum me similem tui arguam te et proponam te ante oculos tuos
Ps 49.22
intellegite hoc qui obliviscimini Deum ne forte capiam et non sit qui liberet
Ps 49.23
qui immolat confessionem glorificat me et qui ordinate ambulat ostendam ei salutare Dei
