Ps 47
Ps 47
Ps 47.1
canticum psalmi filiorum Core
Ps 47.2
magnus Dominus et laudabilis nimis in civitate Dei nostri in monte sancto suo
Ps 47.3
specioso germini gaudio universae terrae monti Sion lateribus aquilonis civitatulae regis magni
Ps 47.4
Deus in domibus eius agnitus est in auxiliando
Ps 47.5
quia ecce reges congregati sunt venerunt simul
Ps 47.6
ipsi videntes sic obstipuerunt conturbati sunt admirati sunt
Ps 47.7
horror possedit eos ibi dolor quasi parturientis
Ps 47.8
in vento uredinis confringes naves maris
Ps 47.9
sicut audivimus ita vidimus in civitate Dei exercituum in civitate Dei nostri Deus fundavit eam usque in aeternum semper
Ps 47.10
aestimavimus Deus misericordiam tuam in medio templi tui
Ps 47.11
secundum nomen tuum Deus sic laus tua usque ad extremum terrae iustitia repleta est dextera tua
Ps 47.12
laetetur mons Sion exultent filiae Iudae propter iudicia tua
Ps 47.13
circumdate Sion et circumite eam numerate turres eius
Ps 47.14
ponite cor vestrum in moenibus separate palatia eius ut narretis in generatione novissima
Ps 47.15
quia ipse Deus Deus noster in saeculum et in perpetuum ipse erit dux noster in morte
