Ps 142
Ps 142
Ps 142.1
canticum David Domine exaudi orationem meam ausculta deprecationem meam in veritate tua exaudi me in iustitia tua
Ps 142.2
et non venias ad iudicandum cum servo tuo quia non iustificabitur in conspectu tuo omnis vivens
Ps 142.3
persecutus est enim inimicus animam meam confregit in terra vitam meam posuit me in tenebris quasi mortuos antiquos
Ps 142.4
et anxius fuit in me spiritus meus in medio mei sollicitum fuit cor meum
Ps 142.5
recordabar dierum antiquorum meditabar omnia opera tua facta manuum tuarum loquebar
Ps 142.6
expandi manus meas ad te anima mea quasi terra sitiens ad te semper
Ps 142.7
cito exaudi me Domine defecit spiritus meus ne abscondas faciem tuam a me et conparabor descendentibus in lacum
Ps 142.8
fac me audire mane misericordiam tuam quoniam in te confido notam fac mihi viam in qua ambulo quoniam ad te levavi animam meam
Ps 142.9
libera me de inimicis meis Domine a te protectus sum
Ps 142.10
doce me ut faciam voluntatem tuam quia tu Deus meus spiritus tuus bonus deducet me in terra recta
Ps 142.11
propter nomen tuum Domine vivificabis me in iustitia tua educes de angustia animam meam
Ps 142.12
et in misericordia tua dissipabis inimicos meos et perdes omnes ligantes animam meam ego enim sum servus tuus
