Ps 143
Ps 143
Ps 143.1
David benedictus Dominus fortis meus qui docet manus meas ad proelium digitos meos ad bellum
Ps 143.2
misericordia mea et fortitudo mea auxiliator meus et salvator meus scutum meum et in ipso speravi qui subiecit populos mihi
Ps 143.3
Domine quid est homo quia cognoscis eum filius hominis quia conputas eum
Ps 143.4
homo vanitati adsimilatus est dies eius quasi umbra pertransiens
Ps 143.5
Domine inclina caelos tuos et descende tange montes et fumigabunt
Ps 143.6
mica fulmine et dissipa eos mitte sagittam tuam et interfice illos
Ps 143.7
extende manum tuam de excelso libera me et erue me de aquis multis de manu filiorum alienorum
Ps 143.8
quorum os locutum est vanitatem et dextera eorum dextera mendacii
Ps 143.9
Deus canticum novum cantabo tibi in psalterio decacordo psallam tibi
Ps 143.10
qui dat salutem regibus qui eruit David servum suum de gladio pessimo
Ps 143.11
libera me et erue me de manu filiorum alienorum quorum os locutum est vanitatem et dextera eorum dextera mendacii
Ps 143.12
ut sint filii nostri quasi plantatio crescens in adulescentia sua filiae nostrae quasi anguli ornati ad similitudinem templi
Ps 143.13
promptuaria nostra plena et supereffundentia ex hoc in illud pecora nostra in milibus et innumerabilia in conpitis nostris
Ps 143.14
tauri nostri pingues non est interruptio et non est egressus et non est ululatus in plateis nostris
Ps 143.15
beatus populus cuius talia sunt beatus populus cuius Dominus Deus suus
