Ps 104
Ps 104
Ps 104.1
alleluia confitemini Domino invocate nomen eius notas facite populis cogitationes eius
Ps 104.2
canite ei et psallite illi loquimini in universis mirabilibus eius
Ps 104.3
exultate in nomine sancto eius laetetur cor quaerentium Dominum
Ps 104.4
quaerite Dominum et virtutem eius quaerite faciem eius iugiter
Ps 104.5
recordamini mirabilium eius quae fecit signorum et iudiciorum oris eius
Ps 104.6
semen Abraham servi eius filii Iacob electi eius
Ps 104.7
ipse Dominus Deus noster in universa terra iudicia eius
Ps 104.8
recordatus est in aeternum pacti sui verbi quod praecepit in mille generationes
Ps 104.9
quod pepigit cum Abraham et iuramenti sui cum Isaac
Ps 104.10
et firmavit illud cum Iacob in lege cum Israhel pactum sempiternum
Ps 104.11
dicens tibi dabo terram Chanaan funiculum hereditatis vestrae
Ps 104.12
cum essent viri pauci modici et advenae in ea
Ps 104.13
et transierunt de gente in gentem de regno ad populum alterum
Ps 104.14
non dimisit hominem ut noceret eis et corripuit pro eis reges
Ps 104.15
nolite tangere christos meos et prophetas meos nolite adfligere
Ps 104.16
et vocavit famem super terram omnem virgam panis contrivit
Ps 104.17
misit ante faciem eorum virum in servum venundatus est Ioseph
Ps 104.18
adflixerunt in conpede pedes eius in ferrum venit anima eius
Ps 104.19
usque ad tempus donec veniret sermo eius eloquium Domini probavit eum
Ps 104.20
misit rex et solvit eum princeps populorum et dimisit illum
Ps 104.21
posuit eum dominum domus suae et principem in omni possessione sua
Ps 104.22
ut erudiret principes eius secundum voluntatem suam et senes eius sapientiam doceret
Ps 104.23
et ingressus est Israhel Aegyptum et Iacob advena fuit in terra Ham
Ps 104.24
et crescere fecit populum suum nimis et roboravit eum super hostes eius
Ps 104.25
convertit cor eorum ut odio haberent populum eius ut dolose agerent contra servos illius
Ps 104.26
misit Mosen servum suum Aaron quem elegit sibi
Ps 104.27
posuit in eis verba signorum suorum et portentorum in terra Ham
Ps 104.28
misit tenebras et contenebravit et non fuerunt increduli verbis eius
Ps 104.29
commutavit aquas eorum in sanguinem et occidit pisces eorum
Ps 104.30
ebullivit terra eorum ranas in cubiculis regum eorum
Ps 104.31
dixit et venit musca omnimoda scinifes in universis terminis eorum
Ps 104.32
dedit pluvias eorum grandinem ignem flammantem in terra eorum
Ps 104.33
et percussit vineam eorum et ficum eorum et confregit lignum finium eorum
Ps 104.34
dixit et venit lucusta et bruchus cuius non erat numerus
Ps 104.35
et comedit omne faenum terrae eorum et devoravit fructum terrae eorum
Ps 104.36
et percussit omne primogenitum in terra eorum primitias universi partus eorum
Ps 104.37
et eduxit eos cum argento et auro et non erat in tribubus eorum infirmus
Ps 104.38
laetata est Aegyptus cum egrederentur quoniam inruerat terror eorum super eos
Ps 104.39
expandit nubem in tentorium et ignem ut luceret nocte
Ps 104.40
petierunt et adduxit ortygometran et pane caelesti saturavit eos
Ps 104.41
aperuit petram et fluxerunt aquae cucurrerunt in aridis flumina
Ps 104.42
quia recordatus est verbi sancti sui cum Abraham servo suo
Ps 104.43
et eduxit populum suum in laetitia laudantes electos suos
Ps 104.44
et dedit eis terras gentium et laborem tribuum possederunt
Ps 104.45
ut custodirent caerimonias eius et leges eius servarent alleluia
