Ps 105
Ps 105
Ps 105.1
alleluia confitemini Domino quoniam bonus quoniam in aeternum misericordia eius
Ps 105.2
quis loquetur fortitudines Domini auditas faciet omnes laudes eius
Ps 105.3
beati qui custodiunt iudicium et faciunt iustitiam in omni tempore
Ps 105.4
recordare mei Domine in repropitiatione populi tui visita me in salutari tuo
Ps 105.5
ut videam bona electorum tuorum et laeter in laetitia gentis tuae et exultem cum hereditate tua
Ps 105.6
peccavimus cum patribus nostris inique fecimus impie egimus
Ps 105.7
patres nostri in Aegypto non intellexerunt mirabilia tua non sunt recordati multitudinis misericordiae tuae et ad iracundiam provocaverunt super mare in mari Rubro
Ps 105.8
salvavit autem eos propter nomen suum ut ostenderet fortitudinem suam
Ps 105.9
et comminatus est mari Rubro et aruit et transduxit eos per abyssos quasi in deserto
Ps 105.10
et salvavit eos de manu odientis et redemit eos de manu inimici
Ps 105.11
et operuit aqua hostes eorum unus de ipsis non superfuit
Ps 105.12
et crediderunt verbis eius cecineruntque laudem eius
Ps 105.13
cito obliti sunt operum illius nec expectaverunt voluntatem eius
Ps 105.14
et desideraverunt desiderium in deserto et temptaverunt Deum in solitudine
Ps 105.15
dedit ergo eis petitionem eorum et misit tenuitatem in animam eorum
Ps 105.16
et zelati sunt Mosen in castris Aaron sanctum Domini
Ps 105.17
aperta est terra et devoravit Dathan et operuit synagogam Abiram
Ps 105.18
et succensus est ignis in synagoga eorum flamma exusit impios
Ps 105.19
fecerunt vitulum in Horeb et adoraverunt conflatile
Ps 105.20
et mutaverunt gloriam suam in similitudine bovis comedentis faenum
Ps 105.21
obliti sunt Dei salvatoris sui qui fecit magnalia in Aegypto
Ps 105.22
mirabilia in terra Ham terribilia super mare Rubrum
Ps 105.23
dixit ergo ut contereret eos nisi Moses electus eius stetisset medius contra faciem illius ut converteret indignationem eius et non interficeret
Ps 105.24
et dispexerunt terram desiderabilem nec crediderunt sermoni eius
Ps 105.25
et murmuraverunt in tabernaculis suis non audierunt vocem Domini
Ps 105.26
et levavit manum suam super eos ut deiceret eos in deserto
Ps 105.27
et ut deiceret semen eorum in gentibus et dispergeret eos in terris
Ps 105.28
et consecrati sunt Beelphegor et comederunt victimas mortuorum
Ps 105.29
et concitaverunt eum in studiis suis et percussit eos plaga
Ps 105.30
stetit autem Finees et deiudicavit et est retenta percussio
Ps 105.31
et reputatum est ei in iustitia in generatione et generatione usque in aeternum
Ps 105.32
et provocaverunt super aquam Contradictionis et adflictus est Moses propter eos
Ps 105.33
quia provocaverunt spiritum eius et praecepit labiis suis
Ps 105.34
non exterminaverunt populos quos dixit Dominus eis
Ps 105.35
et commixti sunt gentibus et didicerunt opera eorum
Ps 105.36
et servierunt sculptilibus eorum et factum est eis in scandalum
Ps 105.37
et immolaverunt filios suos et filias suas daemonibus
Ps 105.38
et effuderunt sanguinem innocentem sanguinem filiorum suorum et filiarum suarum quos immolaverunt sculptilibus Chanaan et polluta est terra sanguinibus
Ps 105.39
et coinquinati sunt in operibus suis et fornicati sunt in studiis suis
Ps 105.40
iratus est itaque furor Domini in populum suum et abominatus est hereditatem suam
Ps 105.41
et dedit eos in manu gentium et dominati sunt eorum qui oderant eos
Ps 105.42
et adflixerunt eos inimici sui et humiliati sunt sub manu eorum
Ps 105.43
multis vicibus liberavit eos ipsi vero provocabant in consiliis suis et humiliati sunt propter iniquitates suas
Ps 105.44
et vidit tribulationem eorum cum audiret eos rogantes
Ps 105.45
et recordatus est pacti sui cum eis et paenituit eum secundum multitudinem misericordiae suae
Ps 105.46
et dedit eos miserabiles coram omnibus qui ceperant eos
Ps 105.47
salva nos Domine Deus noster et congrega nos de gentibus ut confiteamur nomini sancto tuo et canamus laudantes te
Ps 105.48
benedictus Dominus Deus Israhel ab aeterno et usque in aeternum et dicet omnis populus amen alleluia
