Ps 103
Ps 103
Ps 103.1
benedic anima mea Domino Domine Deus meus magnificatus es nimis gloria et decore indutus es
Ps 103.2
amictus luce quasi vestimento extendens caelos ut pellem
Ps 103.3
qui tegis aquis cenacula eius qui ponis nubes currum tuum qui ambulas super pinnas venti
Ps 103.4
qui facis angelos tuos spiritus ministros tuos ignem urentem
Ps 103.5
qui fundasti terram super basem suam non commovebitur in saeculum et in saeculum
Ps 103.6
abysso quasi vestimento operuisti eam super montes stabunt aquae
Ps 103.7
ab increpatione tua fugient a voce tonitrui tui formidabunt
Ps 103.8
ascendent montes et descendent campi ad locum quem fundasti eis
Ps 103.9
terminum posuisti quem non pertransibunt nec revertentur ut operiant terram
Ps 103.10
qui emittis fontes in convallibus ut inter medios montes fluant
Ps 103.11
ut bibant omnia animalia regionum et reficiat onager sitim suam
Ps 103.12
super ea volucres caeli morabuntur de medio nemorum dabunt vocem
Ps 103.13
qui inrigas montes de cenaculis tuis de fructu operum tuorum implebitur terra
Ps 103.14
germinans herbam iumentis et faenum servituti hominum ut educat panem de terra
Ps 103.15
et vinum laetificat cor hominis ad exhilarandam faciem oleo panis autem cor hominis roborat
Ps 103.16
saturabuntur ligna Domini cedri Libani quas plantasti
Ps 103.17
ibi aves nidificabunt milvo abies domus eius
Ps 103.18
montes excelsi cervis petra refugium ericiis
Ps 103.19
fecit lunam per tempora sol cognovit occubitum suum
Ps 103.20
posuisti tenebras et facta est nox in ipsa moventur omnes bestiae silvae
Ps 103.21
leones rugientes ad praedam et quaerentes a Deo escam sibi
Ps 103.22
oriente sole recedent et in speluncis suis cubabunt
Ps 103.23
egreditur homo ad opus suum et ad servitutem suam usque ad vesperam
Ps 103.24
quam multa sunt opera tua Domine omnia in sapientia fecisti impleta est terra possessione tua
Ps 103.25
hoc mare magnum et latum manibus ibi reptilia innumerabilia animalia parva cum grandibus
Ps 103.26
ibi naves pertranseunt Leviathan istum plasmasti ut inluderet ei
Ps 103.27
omnia in te sperant ut des cibum eis in tempore suo
Ps 103.28
dante te illis colligent aperiente manum tuam replebuntur bono
Ps 103.29
abscondes vultum tuum et turbabuntur auferes spiritum eorum et deficient et in pulverem suum revertentur
Ps 103.30
emittes spiritum tuum et creabuntur et instaurabis faciem terrae
Ps 103.31
sit gloria Domini in sempiternum laetabitur Dominus in operibus suis
Ps 103.32
qui respicit terram et tremet tangit montes et fumabunt
Ps 103.33
cantabo Domino in vita mea psallam Deo quamdiu sum
Ps 103.34
placeat ei eloquium meum ego autem laetabor in Domino
Ps 103.35
deficiant peccatores de terra et impii ultra non sint benedic anima mea Domino
