Ps 65
Ps 65
Ps 65.1
victori canticum psalmi iubilate Deo omnis terra
Ps 65.2
cantate gloriam nomini eius date gloriam laudi eius
Ps 65.3
dicite Deo quam terribile opus tuum in multitudine fortitudinis tuae mentientur tibi inimici tui
Ps 65.4
omnis terra adoret te et cantet tibi cantet nomini tuo semper
Ps 65.5
venite et videte opera Dei terribilia consilia super filiis hominum
Ps 65.6
convertit mare in aridam in flumine pertransibunt pede ibi laetabimur in eo
Ps 65.7
qui dominatur in fortitudine sua saeculo oculi eius gentes aspiciunt qui increduli sunt non exaltentur in semet ipsis semper
Ps 65.8
benedicite populi Deo nostro et auditam facite vocem laudis eius
Ps 65.9
qui posuit animam nostram in vitam et non dedit in commotione pedes nostros
Ps 65.10
probasti enim nos Deus igne nos conflasti sicut conflatur argentum
Ps 65.11
introduxisti nos in obsidione posuisti stridorem in dorso nostro
Ps 65.12
inposuisti homines super caput nostrum transivimus per ignem et aquam et eduxisti nos in refrigerium
Ps 65.13
ingrediar domum tuam in holocaustis reddam tibi vota mea
Ps 65.14
quae promiserunt tibi labia mea et locutum est os meum cum tribularer
Ps 65.15
holocausta medullata offeram tibi cum incensu arietum faciam boves cum hircis semper
Ps 65.16
venite audite et narrabo omnes qui timetis Deum quanta fecerit animae meae
Ps 65.17
ipsum ore meo invocavi et exaltavi in lingua mea
Ps 65.18
iniquitatem si vidi in corde meo non exaudiat Dominus
Ps 65.19
ideo exaudivit Deus et adtendit vocem deprecationis meae
Ps 65.20
benedictus Deus qui non abstulit orationem meam et misericordiam suam a me
