Ps 117
Ps 117
Ps 117.1
confitemini Domino quoniam bonus quoniam in aeternum misericordia eius
Ps 117.2
dicat nunc Israhel quoniam in aeternum misericordia eius
Ps 117.3
dicat domus Aaron quoniam in aeternum misericordia eius
Ps 117.4
dicant qui timent Dominum quoniam in aeternum misericordia eius
Ps 117.5
cum tribularer invocavi Dominum et exaudivit me in latitudine Dominus
Ps 117.6
Dominus meus es non timebo quid faciat mihi homo
Ps 117.7
Dominus mihi auxiliator et ego despiciam odientes me
Ps 117.8
melius est sperare in Domino quam sperare in homine
Ps 117.9
melius est sperare in Domino quam sperare in principibus
Ps 117.10
omnes gentes circumdederunt me et in nomine Domini ultus sum eas
Ps 117.11
circumdederunt me et obsederunt me sed in nomine Domini ultus sum eas
Ps 117.12
circumdederunt me quasi apes extinctae sunt quasi ignis spinarum in nomine Domini quia ultus sum eas
Ps 117.13
inpulsus pellebar ut caderem et Dominus sustentavit me
Ps 117.14
fortitudo mea et laus mea Dominus et factus est mihi in salutem
Ps 117.15
vox laudis et salutis in tabernaculis iustorum
Ps 117.16
dextera Domini fecit fortitudinem dextera Domini excelsa dextera Domini fecit fortitudinem
Ps 117.17
non moriar sed vivam et narrabo opera Domini
Ps 117.18
corripiens arguit me Dominus et morti non tradidit me
Ps 117.19
aperite mihi portas iustitiae ingressus eas confitebor Domino
Ps 117.20
haec est porta Domini iusti intrabunt in eam
Ps 117.21
confitebor tibi quoniam exaudisti me et factus es mihi in salutem
Ps 117.22
lapis quem reprobaverunt aedificantes factus est in caput anguli
Ps 117.23
a Domino factum est istud et hoc mirabile in oculis nostris
Ps 117.24
haec est dies quam fecit Dominus exultemus et laetemur in ea
Ps 117.25
obsecro Domine salva obsecro obsecro Domine prosperare obsecro
Ps 117.26
benedictus qui venit in nomine Domini benediximus vobis de domo Domini
Ps 117.27
Deus Dominus et apparuit nobis frequentate sollemnitatem in frondosis usque ad cornua altaris
Ps 117.28
Deus meus es tu et confitebor tibi Deus meus es tu exaltabo te
Ps 117.29
confitemini Domino quoniam bonus quoniam in aeternum misericordia eius
