Von wegen der Mewtterey dicz Sloß Gran geben wir Eur Maiestät weytter Zuuer-nemen, das wir den 18 tag diss Monets, so wir hie, von der hanndlung von Plinttenpurg khomen, den Spanyer widerumben guettlich fragen lassen, welher aber, auf seiner voriger mainung beliben, haben wir Ine den volgennden tag furgestellt, vnd durch die Spieß lauffen lassen, daselbst Er gestorben Vnd sein Schuldt bezallt. Vnd biß aufs lesst in dreyen peychten vnd Zu vil mallen, auf ainer mainung beliben, Allain wie Ime der phaff daz khreucz aus der hanndt genomen, vnd vnder die Spyeß lauffen sollen, het Er gesagt, was Er bekhennt, daz hab Er aus martter vnd pein gethon, solhes ist vns aber nit Zustundan angeZaigt worden, darumben haben wir den husszarn auch peinlich, aber nit so gar häfftig fragen lassen, dann wir die Maister nit gehebt, die Ime seine Arm wider einrichten khunntten, der aber noch nichts bekhennt, allerErsst ist vns vergebenlich angeZaigt, als sol der Hyspanier solhe redt gethon haben, derhalben wir den hyspani-schen haubtman vnd priesster Zuegesprochen, die solches auch also sagen, der haubt-man aber vermaint Er hab daz aus forchtn des Todts gethon.