Ps 9
Ps 9
Ps 9.1
victori pro morte filii canticum David
Ps 9.2
confitebor Domino in toto corde meo narrabo omnia mirabilia tua
Ps 9.3
laetabor et gaudebo in te canam nomini tuo Altissimi
Ps 9.4
cum ceciderint inimici mei retrorsum et corruerint et perierint a facie tua
Ps 9.5
fecisti enim iudicium meum et causam meam sedisti super solium iudex iustitiae
Ps 9.6
increpuisti gentes periit impius nomen eorum delisti in sempiternum et iugiter
Ps 9.7
conpletae sunt solitudines in finem et civitates subvertisti periit memoria eorum cum ipsis
Ps 9.8
Dominus autem in sempiternum sedebit stabilivit ad iudicandum solium suum
Ps 9.9
et ipse iudicat orbem in iustitia iudicat populos in aequitatibus
Ps 9.10
et erit Dominus elevatio oppresso elevatio oportuna in angustia
Ps 9.11
et confident in te qui noverunt nomen tuum quoniam non dereliquisti quaerentes te Domine
Ps 9.12
cantate Domino habitatori Sion adnuntiate in populis commutationes eius
Ps 9.13
quoniam quaerens sanguinem eorum recordatus est nec oblitus est clamoris pauperum
Ps 9.14
misertus est mei Dominus vidit adflictionem meam ex inimicis meis
Ps 9.15
qui exaltat me de portis mortis ut narrem omnes laudes tuas in portis filiae Sion
Ps 9.16
exultabo in salutari tuo demersae sunt gentes in interitu quem fecerunt in rete quod absconderant captus est pes eorum
Ps 9.17
agnitus est Dominus iudicium faciens in opere manuum suarum corruit impius sonitu sempiterno
Ps 9.18
convertantur impii in infernum omnes gentes quae oblitae sunt Deum
Ps 9.19
quoniam non in aeternum oblivioni erit pauper expectatio pauperum non peribit in perpetuum
Ps 9.20
surge Domine non confortetur homo iudicentur gentes ante faciem tuam
Ps 9.21
pone Domine terrorem eis sciant gentes homines se esse semper
Ps 9.22
quare Domine stas a longe dispicis in temporibus angustiae
Ps 9.23
in superbia impii ardet pauper capiantur in sceleribus quae cogitaverunt
Ps 9.24
quia laudavit impius desiderium animae suae et avarus adplaudens sibi
Ps 9.25
blasphemavit Dominum impius secundum altitudinem furoris sui non requiret
Ps 9.26
nec est Deus in omnibus cogitationibus eius parturiunt viae eius in omni tempore longe sunt iudicia tua a facie eius omnes inimicos suos dispicit
Ps 9.27
loquitur in corde suo non movebor in generatione et generatione ero sine malo
Ps 9.28
maledictione os eius plenum est et dolis et avaritia sub lingua eius dolor et iniquitas
Ps 9.29
sedet insidians iuxta vestibula in absconditis ut interficiat innocentem
Ps 9.30
oculi eius robustos tuos circumspiciunt insidiatur in abscondito quasi leo in cubili insidiatur ut rapiat pauperem rapiet pauperem cum adtraxerit eum ad rete suum
Ps 9.31
et confractum subiciet et inruet viribus suis valenter
Ps 9.32
dixit in corde suo oblitus est Deus abscondit faciem suam non respiciet in perpetuum
Ps 9.33
surge Domine Deus leva manum tuam noli oblivisci pauperum
Ps 9.34
quare blasphemat impius Deum dicens in corde suo quod non requirat
Ps 9.35
vides quia tu laborem et furorem respicis ut detur in manu tua tibi relinquuntur fortes tui pupillo tu es factus adiutor
Ps 9.36
contere brachium impii et maligni quaeres impietatem eius et non invenies
Ps 9.37
Dominus rex saeculi et aeternitatis perierunt gentes de terra eius
Ps 9.38
desiderium pauperum audit Dominus praeparasti ut cor eorum audiat auris tua
Ps 9.39
ut iudices pupillum et oppressum et nequaquam ultra superbiat homo de terra
