Ps 55
Ps 55
Ps 55.1
victori pro columba muta eo quod procul abierit David humilis et simplex quando tenuerunt eum Palestini in Geth
Ps 55.2
miserere mei Deus quoniam conculcavit me homo tota die pugnans tribulavit me
Ps 55.3
conculcaverunt me insidiatores mei tota die multi enim qui pugnant contra me Altissime
Ps 55.4
quacumque die territus fuero ego in te confidam
Ps 55.5
in Deo laudavi verbum in Deo speravi non timebo quid faciat caro mihi
Ps 55.6
tota die sermonibus me adfligebant contra me omnes cogitationes eorum in malum
Ps 55.7
congregabuntur abscondite plantas meas observabunt expectantes animam meam
Ps 55.8
quia nullus est salvus in eis in furore populos detrahet Deus
Ps 55.9
secretiora mea numerasti pone lacrimam meam in conspectu tuo sed non in narratione tua
Ps 55.10
tunc convertentur inimici mei retrorsum in quacumque die invocavero hoc scio quia Deus meus es
Ps 55.11
in Deo laudabo verbum in Domino praedicabo sermonem in Deo speravi non timebo quid faciat homo mihi
Ps 55.12
in me sunt Deus vota tua reddam gratiarum actiones tibi
Ps 55.13
quia liberasti animam meam de morte et pedes meos de lapsu ut ambulem coram Deo in luce viventium
