Ps 16
Ps 16
Ps 16.1
oratio David audi Deus iustum intende deprecationem meam auribus percipe orationem meam absque labiis mendacii
Ps 16.2
de vultu tuo iudicium meum prodeat oculi tui videant aequitates
Ps 16.3
probasti cor meum visitasti nocte conflasti me et non invenisti
Ps 16.4
cogitationes meas transire os meum in opere hominum propter verbum labiorum tuorum ego observavi vias latronis
Ps 16.5
sustenta gressus meos in callibus tuis et non labentur vestigia mea
Ps 16.6
ego invocavi te quia exaudies me Deus inclina aurem tuam mihi audi eloquium meum
Ps 16.7
mirabilem fac misericordiam tuam salvator sperantium
Ps 16.8
a resistentibus dexterae tuae custodi me quasi pupillam intus in oculo in umbra alarum tuarum protege me
Ps 16.9
a facie impiorum vastantium me inimici mei animam meam circumdederunt
Ps 16.10
adipe suo concluserunt et ore locuti sunt superbe
Ps 16.11
incedentes adversum me nunc circumdederunt me oculos suos posuerunt declinare in terram
Ps 16.12
similitudo eius quasi leonis desiderantis praedam et quasi catuli leonis sedentis in absconditis
Ps 16.13
surge Domine praeveni faciem eius incurva eum salva animam meam ab impio qui est gladius tuus
Ps 16.14
a viris manus tuae Domine qui mortui sunt in profundo quorum pars in vita et quorum de absconditis tuis replesti ventrem qui satiabuntur filiis et dimittent reliquias suas parvulis eorum
Ps 16.15
ego in iustitia videbo faciem tuam implebor cum evigilavero similitudine tua
