Ps 139
Ps 139
Ps 139.1
pro victoria canticum David
Ps 139.2
erue me Domine ab homine malo a viris iniquis serva me
Ps 139.3
qui cogitaverunt malitias in corde tota die versati sunt in proeliis
Ps 139.4
exacuerunt linguam suam quasi serpens venenum aspidis sub labiis eorum semper
Ps 139.5
custodi me Domine de manu impii a viro iniquitatum serva me qui cogitaverunt subplantare gressus meos
Ps 139.6
absconderunt superbi laqueum mihi et funibus extenderunt rete iuxta semitam offendiculum posuerunt mihi semper
Ps 139.7
dixi Domino Deus meus tu audi Domine vocem deprecationis meae
Ps 139.8
Domine Deus fortitudo salutis meae protexisti caput meum in die belli
Ps 139.9
ne des Domine desideria impii scelera eius ne effundantur et eleventur semper
Ps 139.10
amaritudo convivarum meorum labor labiorum eorum operiat eos
Ps 139.11
cadent super eos carbones ignis deicies eos in foveas ut non consurgant
Ps 139.12
vir linguosus non dirigetur in terra virum iniquum mala capient in interitu
Ps 139.13
scio quod faciet Dominus causam inopis iudicia pauperum
Ps 139.14
attamen iusti confitebuntur nomini tuo habitabunt recti cum vultu tuo
