Ps 108
Ps 108
Ps 108.1
pro victoria David canticum
Ps 108.2
Deus laudabilis mihi ne taceas quia os impii et os dolosi contra me apertum est
Ps 108.3
locuti sunt de me lingua mendacii verbis odii circumdederunt me et expugnaverunt me frustra
Ps 108.4
pro eo quod eos diligebam adversabantur mihi ego autem orabam
Ps 108.5
et posuerunt contra me malum pro bono et odium pro dilectione mea
Ps 108.6
constitue super eum impium et Satan astet a dextris eius
Ps 108.7
cum fuerit iudicatus exeat condemnatus et oratio eius sit in peccatum
Ps 108.8
fiant dies eius parvi episcopatum eius accipiat alter
Ps 108.9
sint filii eius pupilli et uxor eius vidua
Ps 108.10
instabiles vagentur liberi eius et mendicent et quaerantur in parietinis suis
Ps 108.11
scrutetur exactor universa quae habet et diripiant alieni laborem eius
Ps 108.12
non sit qui eius misereatur nec qui clemens sit in pupillos eius
Ps 108.13
fiat novissimum eius interitus in generatione altera deleatur nomen eius
Ps 108.14
redeat in memoria iniquitas patrum eius apud Deum et iniquitas matris eius ne deleatur
Ps 108.15
sit contra Dominum semper et intereat de terra memoria eorum
Ps 108.16
eo quod non est recordatus facere misericordiam
Ps 108.17
et persecutus est virum inopem et pauperem et conpunctum corde ut interficeret
Ps 108.18
et dilexit maledictionem quae veniet ei et noluit benedictionem quae elongabitur ab eo et indutus est maledictione quasi vestimento suo et ingredietur quasi aqua in viscera eius et quasi oleum in ossa eius
Ps 108.19
sit ei quasi pallium quo circumdatur et quasi cingulum quo semper accingitur
Ps 108.20
haec est retributio his qui adversantur mihi a Domino et qui loquuntur malum contra animam meam
Ps 108.21
tu autem Deus Domine fac mecum propter nomen tuum quoniam bona est misericordia tua libera me
Ps 108.22
quoniam egenus et pauper sum et cor meum vulneratum est intrinsecus
Ps 108.23
quasi umbra cum inclinatur abductus sum et excussus quasi lucusta
Ps 108.24
genua mea vacillaverunt a ieiunio et caro mea mutata est absque oleo
Ps 108.25
et ego factus sum obprobrium eis videntes me moverunt caput suum
Ps 108.26
adiuva me Domine Deus meus salva me secundum misericordiam tuam
Ps 108.27
et sciant quoniam manus tua haec tu Domine fecisti eam
Ps 108.28
maledicent illi et tu benedices restiterunt et confundentur servus autem tuus laetabitur
Ps 108.29
induantur adversarii mei confusione et operiantur quasi indumento confusione sua
Ps 108.30
confitebor Domino vehementer in ore meo et in medio populorum laudabo eum
Ps 108.31
quoniam stabit a dextris pauperis ut salvet a iudicibus animam eius
