Mt 13

Teljes szövegű keresés

Mt 13
Mt 13.1
in illo die exiens Iesus de domo sedebat secus mare
Mt 13.2
et congregatae sunt ad eum turbae multae ita ut in naviculam ascendens sederet et omnis turba stabat in litore
Mt 13.3
et locutus est eis multa in parabolis dicens ecce exiit qui seminat seminare
Mt 13.4
et dum seminat quaedam ceciderunt secus viam et venerunt volucres et comederunt ea
Mt 13.5
alia autem ceciderunt in petrosa ubi non habebat terram multam et continuo exorta sunt quia non habebant altitudinem terrae
Mt 13.6
sole autem orto aestuaverunt et quia non habebant radicem aruerunt
Mt 13.7
alia autem ceciderunt in spinas et creverunt spinae et suffocaverunt ea
Mt 13.8
alia vero ceciderunt in terram bonam et dabant fructum aliud centesimum aliud sexagesimum aliud tricesimum
Mt 13.9
qui habet aures audiendi audiat
Mt 13.10
et accedentes discipuli dixerunt ei quare in parabolis loqueris eis
Mt 13.11
qui respondens ait illis quia vobis datum est nosse mysteria regni caelorum illis autem non est datum
Mt 13.12
qui enim habet dabitur ei et abundabit qui autem non habet et quod habet auferetur ab eo
Mt 13.13
ideo in parabolis loquor eis quia videntes non vident et audientes non audiunt neque intellegunt
Mt 13.14
et adimpletur eis prophetia Esaiae dicens auditu audietis et non intellegetis et videntes videbitis et non videbitis
Mt 13.15
incrassatum est enim cor populi huius et auribus graviter audierunt et oculos suos cluserunt nequando oculis videant et auribus audiant et corde intellegant et convertantur et sanem eos
Mt 13.16
vestri autem beati oculi quia vident et aures vestrae quia audiunt
Mt 13.17
amen quippe dico vobis quia multi prophetae et iusti cupierunt videre quae videtis et non viderunt et audire quae auditis et non audierunt
Mt 13.18
vos ergo audite parabolam seminantis
Mt 13.19
omnis qui audit verbum regni et non intellegit venit malus et rapit quod seminatum est in corde eius hic est qui secus viam seminatus est
Mt 13.20
qui autem supra petrosa seminatus est hic est qui verbum audit et continuo cum gaudio accipit illud
Mt 13.21
non habet autem in se radicem sed est temporalis facta autem tribulatione et persecutione propter verbum continuo scandalizatur
Mt 13.22
qui autem est seminatus in spinis hic est qui verbum audit et sollicitudo saeculi istius et fallacia divitiarum suffocat verbum et sine fructu efficitur
Mt 13.23
qui vero in terra bona seminatus est hic est qui audit verbum et intellegit et fructum adfert et facit aliud quidem centum aliud autem sexaginta porro aliud triginta
Mt 13.24
aliam parabolam proposuit illis dicens simile factum est regnum caelorum homini qui seminavit bonum semen in agro suo
Mt 13.25
cum autem dormirent homines venit inimicus eius et superseminavit zizania in medio tritici et abiit
Mt 13.26
cum autem crevisset herba et fructum fecisset tunc apparuerunt et zizania
Mt 13.27
accedentes autem servi patris familias dixerunt ei domine nonne bonum semen seminasti in agro tuo unde ergo habet zizania
Mt 13.28
et ait illis inimicus homo hoc fecit servi autem dixerunt ei vis imus et colligimus ea
Mt 13.29
et ait non ne forte colligentes zizania eradicetis simul cum eis et triticum
Mt 13.30
sinite utraque crescere usque ad messem et in tempore messis dicam messoribus colligite primum zizania et alligate ea fasciculos ad conburendum triticum autem congregate in horreum meum
Mt 13.31
aliam parabolam proposuit eis dicens simile est regnum caelorum grano sinapis quod accipiens homo seminavit in agro suo
Mt 13.32
quod minimum quidem est omnibus seminibus cum autem creverit maius est omnibus holeribus et fit arbor ita ut volucres caeli veniant et habitent in ramis eius
Mt 13.33
aliam parabolam locutus est eis simile est regnum caelorum fermento quod acceptum mulier abscondit in farinae satis tribus donec fermentatum est totum
Mt 13.34
haec omnia locutus est Iesus in parabolis ad turbas et sine parabolis non loquebatur eis
Mt 13.35
ut impleretur quod dictum erat per prophetam dicentem aperiam in parabolis os meum eructabo abscondita a constitutione mundi
Mt 13.36
tunc dimissis turbis venit in domum et accesserunt ad eum discipuli eius dicentes dissere nobis parabolam zizaniorum agri
Mt 13.37
qui respondens ait qui seminat bonum semen est Filius hominis
Mt 13.38
ager autem est mundus bonum vero semen hii sunt filii regni zizania autem filii sunt nequam
Mt 13.39
inimicus autem qui seminavit ea est diabolus messis vero consummatio saeculi est messores autem angeli sunt
Mt 13.40
sicut ergo colliguntur zizania et igni conburuntur sic erit in consummatione saeculi
Mt 13.41
mittet Filius hominis angelos suos et colligent de regno eius omnia scandala et eos qui faciunt iniquitatem
Mt 13.42
et mittent eos in caminum ignis ibi erit fletus et stridor dentium
Mt 13.43
tunc iusti fulgebunt sicut sol in regno Patris eorum qui habet aures audiat
Mt 13.44
simile est regnum caelorum thesauro abscondito in agro quem qui invenit homo abscondit et prae gaudio illius vadit et vendit universa quae habet et emit agrum illum
Mt 13.45
iterum simile est regnum caelorum homini negotiatori quaerenti bonas margaritas
Mt 13.46
inventa autem una pretiosa margarita abiit et vendidit omnia quae habuit et emit eam
Mt 13.47
iterum simile est regnum caelorum sagenae missae in mare et ex omni genere congreganti
Mt 13.48
quam cum impleta esset educentes et secus litus sedentes elegerunt bonos in vasa malos autem foras miserunt
Mt 13.49
sic erit in consummatione saeculi exibunt angeli et separabunt malos de medio iustorum
Mt 13.50
et mittent eos in caminum ignis ibi erit fletus et stridor dentium
Mt 13.51
intellexistis haec omnia dicunt ei etiam
Mt 13.52
ait illis ideo omnis scriba doctus in regno caelorum similis est homini patri familias qui profert de thesauro suo nova et vetera
Mt 13.53
et factum est cum consummasset Iesus parabolas istas transiit inde
Mt 13.54
et veniens in patriam suam docebat eos in synagogis eorum ita ut mirarentur et dicerent unde huic sapientia haec et virtutes
Mt 13.55
nonne hic est fabri filius nonne mater eius dicitur Maria et fratres eius Iacobus et Ioseph et Simon et Iudas
Mt 13.56
et sorores eius nonne omnes apud nos sunt unde ergo huic omnia ista
Mt 13.57
et scandalizabantur in eo Iesus autem dixit eis non est propheta sine honore nisi in patria sua et in domo sua
Mt 13.58
et non fecit ibi virtutes multas propter incredulitatem illorum

 

 

A témában további forrásokat talál az Arcanum Digitális Tudománytárban

ÉRDEKEL A TÖBBI TALÁLAT