לְאָדָם מַעַרְכֵי־לֵב וּמֵיְהוָה
מַעֲנֵה לָשׁוֺן׃
כָּל־דַּרְכֵי־אִישׁ זַך בְּעֵינָיו
וְתֹכֵן רוּחוֺת יְהוָה׃
גֺּל אֶל־יְהוָה מַעֲשֶׂיךָ וְיִכֹּנוּ
מַחְשְׁבֹתֶיךָ׃
כֹּל פָּעַל יְהוָה לַמַּעֲנֵהוּ וְגַמ־רָשָׁע
לְיֺום רָעָה׃
תּוֺעֲבַת יְהוָה כָּל־גְּבַהּ־לֵב
יָד לְיָד לֹא יִנָּקֶה׃
בְּחֶסֶד וֶאֱמֶת יְכֻפַּר עָוֺן וּבְיִרְאַת
יְהוָה סוּר מֵרָע׃
בִּרְצוֺת יְהוָה דַּרְכֵי־אִישׁ גַּמ־אוֺיְבָיו
יַשְׁלִם אִתּוֺ׃
טוֺב־מְעַט בִּצְדָקָה מֵרֹב תְּבוּאוֺת
בְּלֹא מִשְׁפָּט׃
לֵב אָדָם יְחַשֵּׁב דַּרְכּוֺ וַיהוָה
יָכִין צַעֲדוֺ׃
קֶסֶם עַל־שִׂפְתֵי־מֶלֶך בְּמִשְׁפָּט
לֹא יִמְעַל־פִּיו׃
פֶּלֶס וּמֹאזְנֵי מִשְׁפָּט לַיהוָה
מַעֲשֵׂהוּ כָּל־אַבְנֵי־כִיס׃
תּוֺעֲבַת מְלָכִים עֲשׂוֺת רֶשַׁע
כִּי בִצְדָקָה יִכּוֺן כִּסֵּא׃
רְצוֺן מְלָכִים שִׂפְתֵי־צֶדֶק וְדֹבֵר
יְשָׁרִים יֶאֱהָב׃
חֲמַת־מֶלֶך מַלְאֲכֵי־מָוֶת וְאִישׁ
חָכָם יְכַפְּרֶנָּה׃
בְּאוֺר־פְּנֵי־מֶלֶך חַיִּים וּרְצוֺנֺו
כְּעָב מַלְקוֺשׁ׃
קְנֺה־חָכְמָה מַה־טּוֺב מֵחָרוּץ
וּקְנֺות בִּינָה נִבְחָר מִכָּסֶף׃
מְסִלַּת יְשָׁרִים סוּר מֵרָע שֹׁמֵר
נַפְשׁוֺ נֺצֵר דַּרְכּוֺ׃
לִפְנֵי־שֶׁבֶר גָּאוֺן וְלִפְנֵי כִשָּׁלוֺן
גֺּבַהּ רוּחַ׃
טוֺב שְׁפַל־רוּחַ אֶת־עֲנִיִּים 2 עֲנָוִים
מֵחַלֵּק שָׁלָל אֶת־גֵּאִים׃
מַשְׂכִּיל עַל־דָּבָר יִמְצָא־טוֺב
וּבוֺטֵחַ בַּיהוָה אַשְׁרָיו׃
לַחֲכַמ־לֵב יִקָּרֵא נָבוֺן וּמֶתֶק
שְׂפָתַיִם יֺסִיף לֶקַח׃
מְקוֺר חַיִּים שֵׂכֶל בְּעָלָיו וּמוּסַר
אֱוִלִים אִוֶּלֶת׃
לֵב חָכָם יַשְׂכִּיל פִּיהוּ וְעַל־שְׂפָתָיו
יֺסִיף לֶקַח׃
צוּפ־דְּבַשׁ אִמְרֵי־נֺעַם מָתוֺק
לַנֶּפֶשׁ וּמַרְפֵּא לָעָצֶם׃
יֵשׁ דֶּרֶך יָשָׁר לִפְנֵי־אִישׁ וְאַחֲרִיתָהּ
דַּרְכֵי־מָוֶת׃
נֶפֶשׁ עָמֵל עָמְלָה לּוֺ כִּי־אָכַף
עָלָיו פִּיהוּ׃
אִישׁ בְּלִיַּעַל כֹּרֶה רָעָה וְעַל־שְׂפָתָיו 2 שְׂפָתוֺ
כְּאֵשׁ צָרָבֶת׃
אִישׁ תַּהְפֻּכוֺת יְשַׁלַּח מָדוֺן
וְנִרְגָּן מַפְרִיד אַלּוּף׃
אִישׁ חָמָס יְפַתֶּה רֵעֵהוּ וְהוֺלִיכוֺ
בְּדֶרֶך לֹא־טוֺב׃
עֹצֶה עֵינָיו לַחְשֹׁב תַּהְפֻּכוֺת
קֹרֵץ שְׂפָתָיו כִּלָּה רָעָה׃
עֲטֶרֶת תִּפְאֶרֶת שֵׂיבָה בְּדֶרֶך
צְדָקָה תִּמָּצֵא׃
טוֺב אֶרֶך אַפַּיִם מִגִּבּוֺר וּמֹשֵׁל
בְּרוּחוֺ מִלֹּכֵד עִיר׃
בַּחֵיק יוּטַל אֶת־הַגֺּורָל וּמֵיְהוָה
כָּל־מִשְׁפָּטוֺ׃