וַיַּעַן אֱלִיפַז הַתֵּימָנִי וַיֺּאמַר׃
הֶחָכָם יַעֲנֶה דַעַת־רוּחַ וִימַלֵּא
קָדִים בִּטְנֺו׃
הוֺכֵחַ בְּדָבָר לֹא יִסְכּוֺן וּמִלִּים
לֹא־יֺועִיל בָּם׃
אַפ־אַתָּה תָּפֵר יִרְאָה וְתִגְרַע
שִׂיחָה לִפְנֵי־אֵל׃
כִּי יְאַלֵּף עֲוֺנְךָ פִיךָ וְתִבְחַר
לְשׁוֺן עֲרוּמִים׃
יַרְשִׁיעֲךָ פִיךָ וְלֹא־אָנִי וּשְׂפָתֶיךָ
יַעֲנוּ־בָך׃
הֲרִאישׁוֺן אָדָם תִּוָּלֵד וְלִפְנֵי
גְבָעוֺת חוֺלָלְתָּ׃
הַבְסוֺד אֱלוֺהַ תִּשְׁמָע וְתִגְרַע
אֵלֶיךָ חָכְמָה׃
מַה־יָּדַעְתָּ וְלֹא נֵדָע תָּבִין
וְלֹא־עִמָּנוּ הוּא׃
גַּמ־שָׂב גַּמ־יָשִׁישׁ בָּנוּ כַּבִּיר
מֵאָבִיךָ יָמִים׃
הַמְעַט מִמְּךָ תַּנְחֻמוֺת אֵל וְדָבָר
לָאַט עִמָּך׃
מַה־יִּקָּחֲךָ לִבֶּךָ וּמַה־יִּרְזְמוּן
עֵינֶיךָ׃
כִּי־תָשִׁיב אֶל־אֵל רוּחֶךָ וְהֹצֵאתָ
מִפִּיךָ מִלִּין׃
מָה־אֱנֺושׁ כִּי־יִזְכֶּה וְכִי־יִצְדַּק
יְלוּד אִשָּׁה׃
הֵן 1 בִּקְדֹשׁוֺ 2 בִּקְדֹשָׁיו לֹא יַאֲמִין
וְשָׁמַיִם לֹא־זַכּוּ בְעֵינָיו׃
אַף כִּי־נִתְעָב וְנֶאֱלָח אִישׁ־שֹׁתֶה
כַמַּיִם עַוְלָה׃
אֲחַוְּךָ שְׁמַע־לִי וְזֶה־חָזִיתִי
וַאֲסַפֵּרָה׃
אֲשֶׁר־חֲכָמִים יַגִּידוּ וְלֹא כִחֲדוּ
מֵאֲבוֺתָם׃
לָהֶם לְבַדָּם נִתְּנָה הָאָרֶץ וְלֹא־עָבַר
זָר בְּתוֺכָם׃
כָּל־יְמֵי רָשָׁע הוּא מִתְחוֺלֵל
וּמִסְפַּר שָׁנִים נִצְפְּנוּ לֶעָרִיץ׃
קוֺל־פְּחָדִים בְּאָזְנָיו בַּשָּׁלוֺם
שׁוֺדֵד יְבוֺאֶנּוּ׃
לֹא־יַאֲמִין שׁוּב מִנִּי־חֹשֶׁך 1 וְצָפוּ 2 וְצָפוּי
הוּא אֱלֵי־חָרֶב׃
נֺדֵד הוּא לַלֶּחֶם אַיֵּה יָדַע
כִּי־נָכוֺן בְּיָדוֺ יֺומ־חֹשֶׁך׃
יְבַעֲתֻהוּ צַר וּמְצוּקָה תִּתְקְפֵהוּ
כְּמֶלֶך עָתִיד לַכִּידוֺר׃
כִּי־נָטָה אֶל־אֵל יָדוֺ וְאֶל־שַׁדַּי
יִתְגַּבָּר׃
יָרוּץ אֵלָיו בְּצַוָּאר בַּעֲבִי
גַּבֵּי מָגִנָּיו׃
כִּי־כִסָּה פָנָיו בְּחֶלְבּוֺ וַיַּעַשׂ
פִּימָה עֲלֵי־כָסֶל׃
וַיִּשְׁכּוֺן עָרִים נִכְחָדוֺת בָּתִּים
לֹא־יֵשְׁבוּ לָמוֺ אֲשֶׁר הִתְעַתְּדוּ
לְגַלִּים׃
לֹא־יֶעְשַׁר וְלֹא־יָקוּם חֵילוֺ
וְלֹא־יִטֶּה לָאָרֶץ מִנְלָם׃
לֹא־יָסוּר מִנִּי־חֹשֶׁך יֺנַקְתּוֺ
תְּיַבֵּשׁ שַׁלְהָבֶת וְיָסוּר בְּרוּחַ
פִּיו׃
אַל־יַאֲמֵן 1 בַּשּׁוֺ 2 בַּשָּׁיו נִתְעָה
כִּי־שָׁוְא תִּהְיֶה תְמוּרָתוֺ׃
בְּלֹא־יֺומוֺ תִּמָּלֵא וְכִפָּתוֺ לֹא
רַעֲנָנָה׃
יַחְמֹס כַּגֶּפֶן בִּסְרוֺ וְיַשְׁלֵך
כַּזַּיִת נִצָּתוֺ׃
כִּי־עֲדַת חָנֵף גַּלְמוּד וְאֵשׁ
אָכְלָה אָהֳלֵי־שֹׁחַד׃
הָרֹה עָמָל וְיָלֹד אָוֶן וּבִטְנָם
תָּכִין מִרְמָה׃ ס