Jes 35

Full text search

Jes 35
Jes 35.1
יְשֻׂשׂוּם מִדְבָּר וְצִיָּה וְתָגֵל
עֲרָבָה וְתִפְרַח כַּחֲבַצָּלֶת׃
Jes 35.2
פָּרֹחַ תִּפְרַח וְתָגֵל אַף גִּילַת
וְרַנֵּן כְּבוֺד הַלְּבָנֺון נִתַּנ־לָהּ
הֲדַר הַכַּרְמֶל וְהַשָּׁרוֺן הֵמָּה
יִרְאוּ כְבוֺד־יְהוָה הֲדַר אֱלֹהֵינוּ׃
ס
Jes 35.3
חַזְּקוּ יָדַיִם רָפוֺת וּבִרְכַּיִם
כֹּשְׁלוֺת אַמֵּצוּ׃
Jes 35.4
אִמְרוּ לְנִמְהֲרֵי־לֵב חִזְקוּ אַל־תִּירָאוּ
הִנֵּה אֱלֹהֵיכֶם נָקָם יָבוֺא
גְּמוּל אֱלֹהִים הוּא יָבוֺא וְיֺשַׁעֲכֶם׃
Jes 35.5
אָז תִּפָּקַחְנָה עֵינֵי עִוְרִים
וְאָזְנֵי חֵרְשִׁים תִּפָּתַחְנָה׃
Jes 35.6
אָז יְדַלֵּג כָּאַיָּל פִּסֵּחַ וְתָרֹן
לְשׁוֺן אִלֵּם כִּי־נִבְקְעוּ בַמִּדְבָּר
מַיִם וּנְחָלִים בָּעֲרָבָה׃
Jes 35.7
וְהָיָה הַשָּׁרָב לַאֲגַם וְצִמָּאוֺן
לְמַבּוּעֵי מָיִם בִּנְוֵה תַנִּים
רִבְצָהּ חָצִיר לְקָנֶה וָגֺמֶא׃
Jes 35.8
וְהָיָה־שָׁם מַסְלוּל וָדֶרֶך וְדֶרֶך
הַקֹּדֶשׁ יִקָּרֵא לָהּ לֹא־יַעַבְרֶנּוּ
טָמֵא וְהוּא־לָמוֺ הֹלֵך דֶּרֶך
וֶאֱוִילִים לֹא יִתְעוּ׃
Jes 35.9
לֹא־יִהְיֶה שָׁם אַרְיֵה וּפְרִיץ
חַיֺּות בַּל־יַעֲלֶנָּה לֹא תִמָּצֵא
שָׁם וְהָלְכוּ גְּאוּלִים׃
Jes 35.10
וּפְדוּיֵי יְהוָה יְשֻׁבוּן וּבָאוּ
צִיֺּון בְּרִנָּה וְשִׂמְחַת עוֺלָם
עַל־רֹאשָׁם שָׂשׂוֺן וְשִׂמְחָה יַשִּׂיגוּ
וְנָסוּ יָגֺון וַאֲנָחָה׃ ף

 

 

A témában további forrásokat talál az Arcanum Digitális Tudománytárban

ÉRDEKEL A TÖBBI TALÁLAT