Ac 27

Teljes szövegű keresés

Ac 27
Ac 27.1
ut autem iudicatum est eum navigare in Italiam et tradi Paulum cum reliquis custodiis centurioni nomine Iulio cohortis Augustae
Ac 27.2
ascendentes autem navem hadrumetinam incipientem navigare circa Asiae loca sustulimus perseverante nobiscum Aristarcho Macedone Thessalonicense
Ac 27.3
sequenti autem die devenimus Sidonem humane autem tractans Iulius Paulum permisit ad amicos ire et curam sui agere
Ac 27.4
et inde cum sustulissemus subnavigavimus Cypro propterea quod essent venti contrarii
Ac 27.5
et pelagus Ciliciae et Pamphiliae navigantes venimus Lystram quae est Lyciae
Ac 27.6
et ibi inveniens centurio navem alexandrinam navigantem in Italiam transposuit nos in eam
Ac 27.7
et cum multis diebus tarde navigaremus et vix devenissemus contra Cnidum prohibente nos vento adnavigavimus Cretae secundum Salmonem
Ac 27.8
et vix iuxta navigantes venimus in locum quendam qui vocatur Boni portus cui iuxta erat civitas Thalassa
Ac 27.9
multo autem tempore peracto et cum iam non esset tuta navigatio eo quod et ieiunium iam praeterisset consolabatur Paulus
Ac 27.10
dicens eis viri video quoniam cum iniuria et multo damno non solum oneris et navis sed etiam animarum nostrarum incipit esse navigatio
Ac 27.11
centurio autem gubernatori et nauclerio magis credebat quam his quae a Paulo dicebantur
Ac 27.12
et cum aptus portus non esset ad hiemandum plurimi statuerunt consilium navigare inde si quo modo possent devenientes Phoenice hiemare portum Cretae respicientem ad africum et ad chorum
Ac 27.13
adspirante autem austro aestimantes propositum se tenere cum sustulissent de Asson legebant Cretam
Ac 27.14
non post multum autem misit se contra ipsam ventus typhonicus qui vocatur euroaquilo
Ac 27.15
cumque arrepta esset navis et non posset conari in ventum data nave flatibus ferebamur
Ac 27.16
insulam autem quandam decurrentes quae vocatur Caudam potuimus vix obtinere scapham
Ac 27.17
qua sublata adiutoriis utebantur accingentes navem timentes ne in Syrtim inciderent submisso vase sic ferebantur
Ac 27.18
valide autem nobis tempestate iactatis sequenti die iactum fecerunt
Ac 27.19
et tertia die suis manibus armamenta navis proiecerunt
Ac 27.20
neque sole autem neque sideribus apparentibus per plures dies et tempestate non exigua inminente iam ablata erat spes omnis salutis nostrae
Ac 27.21
et cum multa ieiunatio fuisset tunc stans Paulus in medio eorum dixit oportebat quidem o viri audito me non tollere a Creta lucrique facere iniuriam hanc et iacturam
Ac 27.22
et nunc suadeo vobis bono animo esse amissio enim nullius animae erit ex vobis praeterquam navis
Ac 27.23
adstitit enim mihi hac nocte angelus Dei cuius sum ego et cui deservio
Ac 27.24
dicens ne timeas Paule Caesari te oportet adsistere et ecce donavit tibi Deus omnes qui navigant tecum
Ac 27.25
propter quod bono animo estote viri credo enim Deo quia sic erit quemadmodum dictum est mihi
Ac 27.26
in insulam autem quandam oportet nos devenire
Ac 27.27
sed posteaquam quartadecima nox supervenit navigantibus nobis in Hadria circa mediam noctem suspicabantur nautae apparere sibi aliquam regionem
Ac 27.28
qui submittentes invenerunt passus viginti et pusillum inde separati invenerunt passus quindecim
Ac 27.29
timentes autem ne in aspera loca incideremus de puppi mittentes anchoras quattuor optabant diem fieri
Ac 27.30
nautis vero quaerentibus fugere de navi cum misissent scapham in mare sub obtentu quasi a prora inciperent anchoras extendere
Ac 27.31
dixit Paulus centurioni et militibus nisi hii in navi manserint vos salvi fieri non potestis
Ac 27.32
tunc absciderunt milites funes scaphae et passi sunt eam excidere
Ac 27.33
et cum lux inciperet fieri rogabat Paulus omnes sumere cibum dicens quartadecima hodie die expectantes ieiuni permanetis nihil accipientes
Ac 27.34
propter quod rogo vos accipere cibum pro salute vestra quia nullius vestrum capillus de capite peribit
Ac 27.35
et cum haec dixisset sumens panem gratias egit Deo in conspectu omnium et cum fregisset coepit manducare
Ac 27.36
animaequiores autem facti omnes et ipsi adsumpserunt cibum
Ac 27.37
eramus vero universae animae in navi ducentae septuaginta sex
Ac 27.38
et satiati cibo adleviabant navem iactantes triticum in mare
Ac 27.39
cum autem dies factus esset terram non agnoscebant sinum vero quendam considerabant habentem litus in quem cogitabant si possent eicere navem
Ac 27.40
et cum anchoras abstulissent committebant se mari simul laxantes iuncturas gubernaculorum et levato artemone secundum flatum aurae tendebant ad litus
Ac 27.41
et cum incidissemus in locum bithalassum inpegerunt navem et prora quidem fixa manebat inmobilis puppis vero solvebatur a vi maris
Ac 27.42
militum autem consilium fuit ut custodias occiderent ne quis cum enatasset effugeret
Ac 27.43
centurio autem volens servare Paulum prohibuit fieri iussitque eos qui possent natare mittere se primos et evadere et ad terram exire
Ac 27.44
et ceteros alios in tabulis ferebant quosdam super ea quae de navi essent et sic factum est ut omnes animae evaderent ad terram

 

 

Arcanum Újságok
Arcanum Újságok

Kíváncsi, mit írtak az újságok erről a temáról az elmúlt 250 évben?

Megnézem

Arcanum logo

Az Arcanum Adatbázis Kiadó Magyarország vezető tartalomszolgáltatója, 1989. január elsején kezdte meg működését. A cég kulturális tartalmak nagy tömegű digitalizálásával, adatbázisokba rendezésével és publikálásával foglalkozik.

Rólunk Kapcsolat Sajtószoba

Languages