Lc 10

Teljes szövegű keresés

Lc 10
Lc 10.1
post haec autem designavit Dominus et alios septuaginta duos et misit illos binos ante faciem suam in omnem civitatem et locum quo erat ipse venturus
Lc 10.2
et dicebat illis messis quidem multa operarii autem pauci rogate ergo Dominum messis ut mittat operarios in messem
Lc 10.3
ite ecce ego mitto vos sicut agnos inter lupos
Lc 10.4
nolite portare sacculum neque peram neque calciamenta et neminem per viam salutaveritis
Lc 10.5
in quamcumque domum intraveritis primum dicite pax huic domui
Lc 10.6
et si ibi fuerit filius pacis requiescet super illam pax vestra sin autem ad vos revertetur
Lc 10.7
in eadem autem domo manete edentes et bibentes quae apud illos sunt dignus enim est operarius mercede sua nolite transire de domo in domum
Lc 10.8
et in quamcumque civitatem intraveritis et susceperint vos manducate quae adponuntur vobis
Lc 10.9
et curate infirmos qui in illa sunt et dicite illis adpropinquavit in vos regnum Dei
Lc 10.10
in quamcumque civitatem intraveritis et non receperint vos exeuntes in plateas eius dicite
Lc 10.11
etiam pulverem qui adhesit nobis de civitate vestra extergimus in vos tamen hoc scitote quia adpropinquavit regnum Dei
Lc 10.12
dico vobis quia Sodomis in die illa remissius erit quam illi civitati
Lc 10.13
vae tibi Corazain vae tibi Bethsaida quia si in Tyro et Sidone factae fuissent virtutes quae in vobis factae sunt olim in cilicio et cinere sedentes paeniterent
Lc 10.14
verumtamen Tyro et Sidoni remissius erit in iudicio quam vobis
Lc 10.15
et tu Capharnaum usque in caelum exaltata usque ad infernum demergeris
Lc 10.16
qui vos audit me audit et qui vos spernit me spernit qui autem me spernit spernit eum qui me misit
Lc 10.17
reversi sunt autem septuaginta duo cum gaudio dicentes Domine etiam daemonia subiciuntur nobis in nomine tuo
Lc 10.18
et ait illis videbam Satanan sicut fulgur de caelo cadentem
Lc 10.19
ecce dedi vobis potestatem calcandi supra serpentes et scorpiones et supra omnem virtutem inimici et nihil vobis nocebit
Lc 10.20
verumtamen in hoc nolite gaudere quia spiritus vobis subiciuntur gaudete autem quod nomina vestra scripta sunt in caelis
Lc 10.21
in ipsa hora exultavit Spiritu Sancto et dixit confiteor tibi Pater Domine caeli et terrae quod abscondisti haec a sapientibus et prudentibus et revelasti ea parvulis etiam Pater quia sic placuit ante te
Lc 10.22
omnia mihi tradita sunt a Patre meo et nemo scit qui sit Filius nisi Pater et qui sit Pater nisi Filius et cui voluerit Filius revelare
Lc 10.23
et conversus ad discipulos suos dixit beati oculi qui vident quae videtis
Lc 10.24
dico enim vobis quod multi prophetae et reges voluerunt videre quae vos videtis et non viderunt et audire quae auditis et non audierunt
Lc 10.25
et ecce quidam legis peritus surrexit temptans illum et dicens magister quid faciendo vitam aeternam possidebo
Lc 10.26
at ille dixit ad eum in lege quid scriptum est quomodo legis
Lc 10.27
ille respondens dixit diliges Dominum Deum tuum ex toto corde tuo et ex tota anima tua et ex omnibus viribus tuis et ex omni mente tua et proximum tuum sicut te ipsum
Lc 10.28
dixitque illi recte respondisti hoc fac et vives
Lc 10.29
ille autem volens iustificare se ipsum dixit ad Iesum et quis est meus proximus
Lc 10.30
suscipiens autem Iesus dixit homo quidam descendebat ab Hierusalem in Hiericho et incidit in latrones qui etiam despoliaverunt eum et plagis inpositis abierunt semivivo relicto
Lc 10.31
accidit autem ut sacerdos quidam descenderet eadem via et viso illo praeterivit
Lc 10.32
similiter et Levita cum esset secus locum et videret eum pertransiit
Lc 10.33
Samaritanus autem quidam iter faciens venit secus eum et videns eum misericordia motus est
Lc 10.34
et adpropians alligavit vulnera eius infundens oleum et vinum et inponens illum in iumentum suum duxit in stabulum et curam eius egit
Lc 10.35
et altera die protulit duos denarios et dedit stabulario et ait curam illius habe et quodcumque supererogaveris ego cum rediero reddam tibi
Lc 10.36
quis horum trium videtur tibi proximus fuisse illi qui incidit in latrones
Lc 10.37
at ille dixit qui fecit misericordiam in illum et ait illi Iesus vade et tu fac similiter
Lc 10.38
factum est autem dum irent et ipse intravit in quoddam castellum et mulier quaedam Martha nomine excepit illum in domum suam
Lc 10.39
et huic erat soror nomine Maria quae etiam sedens secus pedes Domini audiebat verbum illius
Lc 10.40
Martha autem satagebat circa frequens ministerium quae stetit et ait Domine non est tibi curae quod soror mea reliquit me solam ministrare dic ergo illi ut me adiuvet
Lc 10.41
et respondens dixit illi Dominus Martha Martha sollicita es et turbaris erga plurima
Lc 10.42
porro unum est necessarium Maria optimam partem elegit quae non auferetur ab ea

 

 

Arcanum Újságok
Arcanum Újságok

Kíváncsi, mit írtak az újságok erről a temáról az elmúlt 250 évben?

Megnézem

Arcanum logo

Az Arcanum Adatbázis Kiadó Magyarország vezető tartalomszolgáltatója, 1989. január elsején kezdte meg működését. A cég kulturális tartalmak nagy tömegű digitalizálásával, adatbázisokba rendezésével és publikálásával foglalkozik.

Rólunk Kapcsolat Sajtószoba

Languages