Mc 10

Teljes szövegű keresés

Mc 10
Mc 10.1
et inde exsurgens venit in fines Iudaeae ultra Iordanen et conveniunt iterum turbae ad eum et sicut consueverat iterum docebat illos
Mc 10.2
et accedentes Pharisaei interrogabant eum si licet viro uxorem dimittere temptantes eum
Mc 10.3
at ille respondens dixit eis quid vobis praecepit Moses
Mc 10.4
qui dixerunt Moses permisit libellum repudii scribere et dimittere
Mc 10.5
quibus respondens Iesus ait ad duritiam cordis vestri scripsit vobis praeceptum istud
Mc 10.6
ab initio autem creaturae masculum et feminam fecit eos Deus
Mc 10.7
propter hoc relinquet homo patrem suum et matrem et adherebit ad uxorem suam
Mc 10.8
et erunt duo in carne una itaque iam non sunt duo sed una caro
Mc 10.9
quod ergo Deus iunxit homo non separet
Mc 10.10
et in domo iterum discipuli eius de eodem interrogaverunt eum
Mc 10.11
et dicit illis quicumque dimiserit uxorem suam et aliam duxerit adulterium committit super eam
Mc 10.12
et si uxor dimiserit virum suum et alii nupserit moechatur
Mc 10.13
et offerebant illi parvulos ut tangeret illos discipuli autem comminabantur offerentibus
Mc 10.14
quos cum videret Iesus indigne tulit et ait illis sinite parvulos venire ad me et ne prohibueritis eos talium est enim regnum Dei
Mc 10.15
amen dico vobis quisque non receperit regnum Dei velut parvulus non intrabit in illud
Mc 10.16
et conplexans eos et inponens manus super illos benedicebat eos
Mc 10.17
et cum egressus esset in viam procurrens quidam genu flexo ante eum rogabat eum magister bone quid faciam ut vitam aeternam percipiam
Mc 10.18
Iesus autem dixit ei quid me dicis bonum nemo bonus nisi unus Deus
Mc 10.19
praecepta nosti ne adulteres ne occidas ne fureris ne falsum testimonium dixeris ne fraudem feceris honora patrem tuum et matrem
Mc 10.20
et ille respondens ait illi magister omnia haec conservavi a iuventute mea
Mc 10.21
Iesus autem intuitus eum dilexit eum et dixit illi unum tibi deest vade quaecumque habes vende et da pauperibus et habebis thesaurum in caelo et veni sequere me
Mc 10.22
qui contristatus in verbo abiit maerens erat enim habens possessiones multas
Mc 10.23
et circumspiciens Iesus ait discipulis suis quam difficile qui pecunias habent in regnum Dei introibunt
Mc 10.24
discipuli autem obstupescebant in verbis eius at Iesus rursus respondens ait illis filioli quam difficile est confidentes in pecuniis regnum Dei introire
Mc 10.25
facilius est camelum per foramen acus transire quam divitem intrare in regnum Dei
Mc 10.26
qui magis admirabantur dicentes ad semet ipsos et quis potest salvus fieri
Mc 10.27
et intuens illos Iesus ait apud homines inpossibile est sed non apud Deum omnia enim possibilia sunt apud Deum
Mc 10.28
coepit Petrus ei dicere ecce nos dimisimus omnia et secuti sumus te
Mc 10.29
respondens Iesus ait amen dico vobis nemo est qui reliquerit domum aut fratres aut sorores aut matrem aut patrem aut filios aut agros propter me et propter evangelium
Mc 10.30
qui non accipiat centies tantum nunc in tempore hoc domos et fratres et sorores et matres et filios et agros cum persecutionibus et in saeculo futuro vitam aeternam
Mc 10.31
multi autem erunt primi novissimi et novissimi primi
Mc 10.32
erant autem in via ascendentes in Hierosolyma et praecedebat illos Iesus et stupebant et sequentes timebant et adsumens iterum duodecim coepit illis dicere quae essent ei ventura
Mc 10.33
quia ecce ascendimus in Hierosolyma et Filius hominis tradetur principibus sacerdotum et scribis et senioribus et damnabunt eum morti et tradent eum gentibus
Mc 10.34
et inludent ei et conspuent eum et flagellabunt eum et interficient eum et tertia die resurget
Mc 10.35
et accedunt ad illum Iacobus et Iohannes filii Zebedaei dicentes magister volumus ut quodcumque petierimus facias nobis
Mc 10.36
at ille dixit eis quid vultis ut faciam vobis
Mc 10.37
et dixerunt da nobis ut unus ad dexteram tuam et alius ad sinistram tuam sedeamus in gloria tua
Mc 10.38
Iesus autem ait eis nescitis quid petatis potestis bibere calicem quem ego bibo aut baptismum quo ego baptizor baptizari
Mc 10.39
at illi dixerunt ei possumus Iesus autem ait eis calicem quidem quem ego bibo bibetis et baptismum quo ego baptizor baptizabimini
Mc 10.40
sedere autem ad dexteram meam vel ad sinistram non est meum dare sed quibus paratum est
Mc 10.41
et audientes decem coeperunt indignari de Iacobo et Iohanne
Mc 10.42
Iesus autem vocans eos ait illis scitis quia hii qui videntur principari gentibus dominantur eis et principes eorum potestatem habent ipsorum
Mc 10.43
non ita est autem in vobis sed quicumque voluerit fieri maior erit vester minister
Mc 10.44
et quicumque voluerit in vobis primus esse erit omnium servus
Mc 10.45
nam et Filius hominis non venit ut ministraretur ei sed ut ministraret et daret animam suam redemptionem pro multis
Mc 10.46
et veniunt Hierichum et proficiscente eo de Hiericho et discipulis eius et plurima multitudine filius Timei Bartimeus caecus sedebat iuxta viam mendicans
Mc 10.47
qui cum audisset quia Iesus Nazarenus est coepit clamare et dicere Fili David Iesu miserere mei
Mc 10.48
et comminabantur illi multi ut taceret at ille multo magis clamabat Fili David miserere mei
Mc 10.49
et stans Iesus praecepit illum vocari et vocant caecum dicentes ei animaequior esto surge vocat te
Mc 10.50
qui proiecto vestimento suo exiliens venit ad eum
Mc 10.51
et respondens illi Iesus dixit quid vis tibi faciam caecus autem dixit ei rabboni ut videam
Mc 10.52
Iesus autem ait illi vade fides tua te salvum fecit et confestim vidit et sequebatur eum in via

 

 

Arcanum Újságok
Arcanum Újságok

Kíváncsi, mit írtak az újságok erről a temáról az elmúlt 250 évben?

Megnézem

Arcanum logo

Az Arcanum Adatbázis Kiadó Magyarország vezető tartalomszolgáltatója, 1989. január elsején kezdte meg működését. A cég kulturális tartalmak nagy tömegű digitalizálásával, adatbázisokba rendezésével és publikálásával foglalkozik.

Rólunk Kapcsolat Sajtószoba

Languages