Mt 27

Teljes szövegű keresés

Mt 27
Mt 27.1
mane autem facto consilium inierunt omnes principes sacerdotum et seniores populi adversus Iesum ut eum morti traderent
Mt 27.2
et vinctum adduxerunt eum et tradiderunt Pontio Pilato praesidi
Mt 27.3
tunc videns Iudas qui eum tradidit quod damnatus esset paenitentia ductus rettulit triginta argenteos principibus sacerdotum et senioribus
Mt 27.4
dicens peccavi tradens sanguinem iustum at illi dixerunt quid ad nos tu videris
Mt 27.5
et proiectis argenteis in templo recessit et abiens laqueo se suspendit
Mt 27.6
principes autem sacerdotum acceptis argenteis dixerunt non licet mittere eos in corbanan quia pretium sanguinis est
Mt 27.7
consilio autem inito emerunt ex illis agrum figuli in sepulturam peregrinorum
Mt 27.8
propter hoc vocatus est ager ille Acheldemach ager sanguinis usque in hodiernum diem
Mt 27.9
tunc impletum est quod dictum est per Hieremiam prophetam dicentem et acceperunt triginta argenteos pretium adpretiati quem adpretiaverunt a filiis Israhel
Mt 27.10
et dederunt eos in agrum figuli sicut constituit mihi Dominus
Mt 27.11
Iesus autem stetit ante praesidem et interrogavit eum praeses dicens tu es rex Iudaeorum dicit ei Iesus tu dicis
Mt 27.12
et cum accusaretur a principibus sacerdotum et senioribus nihil respondit
Mt 27.13
tunc dicit illi Pilatus non audis quanta adversum te dicant testimonia
Mt 27.14
et non respondit ei ad ullum verbum ita ut miraretur praeses vehementer
Mt 27.15
per diem autem sollemnem consueverat praeses dimittere populo unum vinctum quem voluissent
Mt 27.16
habebat autem tunc vinctum insignem qui dicebatur Barabbas
Mt 27.17
congregatis ergo illis dixit Pilatus quem vultis dimittam vobis Barabban an Iesum qui dicitur Christus
Mt 27.18
sciebat enim quod per invidiam tradidissent eum
Mt 27.19
sedente autem illo pro tribunali misit ad illum uxor eius dicens nihil tibi et iusto illi multa enim passa sum hodie per visum propter eum
Mt 27.20
princeps autem sacerdotum et seniores persuaserunt populis ut peterent Barabban Iesum vero perderent
Mt 27.21
respondens autem praeses ait illis quem vultis vobis de duobus dimitti at illi dixerunt Barabban
Mt 27.22
dicit illis Pilatus quid igitur faciam de Iesu qui dicitur Christus
Mt 27.23
dicunt omnes crucifigatur ait illis praeses quid enim mali fecit at illi magis clamabant dicentes crucifigatur
Mt 27.24
videns autem Pilatus quia nihil proficeret sed magis tumultus fieret accepta aqua lavit manus coram populo dicens innocens ego sum a sanguine iusti huius vos videritis
Mt 27.25
et respondens universus populus dixit sanguis eius super nos et super filios nostros
Mt 27.26
tunc dimisit illis Barabban Iesum autem flagellatum tradidit eis ut crucifigeretur
Mt 27.27
tunc milites praesidis suscipientes Iesum in praetorio congregaverunt ad eum universam cohortem
Mt 27.28
et exuentes eum clamydem coccineam circumdederunt ei
Mt 27.29
et plectentes coronam de spinis posuerunt super caput eius et harundinem in dextera eius et genu flexo ante eum inludebant dicentes have rex Iudaeorum
Mt 27.30
et expuentes in eum acceperunt harundinem et percutiebant caput eius
Mt 27.31
et postquam inluserunt ei exuerunt eum clamydem et induerunt eum vestimentis eius et duxerunt eum ut crucifigerent
Mt 27.32
exeuntes autem invenerunt hominem cyreneum nomine Simonem hunc angariaverunt ut tolleret crucem eius
Mt 27.33
et venerunt in locum qui dicitur Golgotha quod est Calvariae locus
Mt 27.34
et dederunt ei vinum bibere cum felle mixtum et cum gustasset noluit bibere
Mt 27.35
postquam autem crucifixerunt eum diviserunt vestimenta eius sortem mittentes
Mt 27.36
et sedentes servabant eum
Mt 27.37
et inposuerunt super caput eius causam ipsius scriptam hic est Iesus rex Iudaeorum
Mt 27.38
tunc crucifixi sunt cum eo duo latrones unus a dextris et unus a sinistris
Mt 27.39
praetereuntes autem blasphemabant eum moventes capita sua
Mt 27.40
et dicentes qui destruit templum et in triduo illud reaedificat salva temet ipsum si Filius Dei es descende de cruce
Mt 27.41
similiter et principes sacerdotum inludentes cum scribis et senioribus dicentes
Mt 27.42
alios salvos fecit se ipsum non potest salvum facere si rex Israhel est descendat nunc de cruce et credemus ei
Mt 27.43
confidet in Deo liberet nunc eum si vult dixit enim quia Dei Filius sum
Mt 27.44
id ipsum autem et latrones qui fixi erant cum eo inproperabant ei
Mt 27.45
a sexta autem hora tenebrae factae sunt super universam terram usque ad horam nonam
Mt 27.46
et circa horam nonam clamavit Iesus voce magna dicens Heli Heli lema sabacthani hoc est Deus meus Deus meus ut quid dereliquisti me
Mt 27.47
quidam autem illic stantes et audientes dicebant Heliam vocat iste
Mt 27.48
et continuo currens unus ex eis acceptam spongiam implevit aceto et inposuit harundini et dabat ei bibere
Mt 27.49
ceteri vero dicebant sine videamus an veniat Helias liberans eum
Mt 27.50
Iesus autem iterum clamans voce magna emisit spiritum
Mt 27.51
et ecce velum templi scissum est in duas partes a summo usque deorsum et terra mota est et petrae scissae sunt
Mt 27.52
et monumenta aperta sunt et multa corpora sanctorum qui dormierant surrexerunt
Mt 27.53
et exeuntes de monumentis post resurrectionem eius venerunt in sanctam civitatem et apparuerunt multis
Mt 27.54
centurio autem et qui cum eo erant custodientes Iesum viso terraemotu et his quae fiebant timuerunt valde dicentes vere Dei Filius erat iste
Mt 27.55
erant autem ibi mulieres multae a longe quae secutae erant Iesum a Galilaea ministrantes ei
Mt 27.56
inter quas erat Maria Magdalene et Maria Iacobi et Ioseph mater et mater filiorum Zebedaei
Mt 27.57
cum sero autem factum esset venit quidam homo dives ab Arimathia nomine Ioseph qui et ipse discipulus erat Iesu
Mt 27.58
hic accessit ad Pilatum et petiit corpus Iesu tunc Pilatus iussit reddi corpus
Mt 27.59
et accepto corpore Ioseph involvit illud sindone munda
Mt 27.60
et posuit illud in monumento suo novo quod exciderat in petra et advolvit saxum magnum ad ostium monumenti et abiit
Mt 27.61
erat autem ibi Maria Magdalene et altera Maria sedentes contra sepulchrum
Mt 27.62
altera autem die quae est post parasceven convenerunt principes sacerdotum et Pharisaei ad Pilatum
Mt 27.63
dicentes domine recordati sumus quia seductor ille dixit adhuc vivens post tres dies resurgam
Mt 27.64
iube ergo custodiri sepulchrum usque in diem tertium ne forte veniant discipuli eius et furentur eum et dicant plebi surrexit a mortuis et erit novissimus error peior priore
Mt 27.65
ait illis Pilatus habetis custodiam ite custodite sicut scitis
Mt 27.66
illi autem abeuntes munierunt sepulchrum signantes lapidem cum custodibus

 

 

Arcanum Újságok
Arcanum Újságok

Kíváncsi, mit írtak az újságok erről a temáról az elmúlt 250 évben?

Megnézem

Arcanum logo

Az Arcanum Adatbázis Kiadó Magyarország vezető tartalomszolgáltatója, 1989. január elsején kezdte meg működését. A cég kulturális tartalmak nagy tömegű digitalizálásával, adatbázisokba rendezésével és publikálásával foglalkozik.

Rólunk Kapcsolat Sajtószoba

Languages