Dan 7

Teljes szövegű keresés

Dan 7
Dan 7.1
בִּשְׁנַת חֲדָה לְבֵלְאשַׁצַּר מֶלֶך
בָּבֶל דָּנִיֵּאל חֵלֶם חֲזָה וְחֶזְוֵי
רֵאשֵׁהּ עַל־מִשְׁכְּבֵהּ בֵּאדַיִן חֶלְמָא
כְתַב רֵאשׁ מִלִּין אֲמַר׃
Dan 7.2
עָנֵה דָנִיֵּאל וְאָמַר חָזֵה הֲוֵית
בְּחֶזְוִי עִמ־לֵילְיָא וַאֲרוּ אַרְבַּע
רוּחֵי שְׁמַיָּא מְגִיחָן לְיַמָּא
רַבָּא׃
Dan 7.3
וְאַרְבַּע חֵיוָן רַבְרְבָן סָלְקָן
מִנ־יַמָּא שָׁנְיָן דָּא מִנ־דָּא׃
Dan 7.4
קַדְמָיְתָא כְאַרְיֵה וְגַפִּין דִּי־נְשַׁר
לַהּ חָזֵה הֲוֵית עַד דִּי־מְּרִיטוּ
גַפַּיהּ וּנְטִילַת מִנ־אַרְעָא וְעַל־רַגְלַיִן
כֶּאֱנָשׁ הֳקִימַת וּלְבַב אֱנָשׁ
יְהִיב לַהּ׃
Dan 7.5
וַאֲרוּ חֵיוָה אָחֳרִי תִנְיָנָה
דָּמְיָה לְדֹב וְלִשְׂטַר־חַד הֳקִמַת
וּתְלָת עִלְעִין בְּפֻמַּהּ בֵּין 1 שִׁנַּיַּהּ 2 שִׁנַּהּ
וְכֵן אָמְרִין לַהּ קוּמִי אֲכֻלִי
בְּשַׂר שַׂגִּיא׃
Dan 7.6
בָּאתַר דְּנָה חָזֵה הֲוֵית וַאֲרוּ
אָחֳרִי כִּנְמַר וְלַהּ גַּפִּין אַרְבַּע
דִּי־עוֺף עַל־גַּבַּיַּהּ 2 גַּבַּהּ וְאַרְבְּעָה
רֵאשִׁין לְחֵיתָא וְשָׁלְטָן יְהִיב
לַהּ׃
Dan 7.7
בָּאתַר דְּנָה חָזֵה הֲוֵית בְּחֶזְוֵי
לֵילְיָא וַאֲרוּ חֵיוָה 1 רְבִיעָיָה 2 רְבִיעָאָה
דְּחִילָה וְאֵימְתָנִי וְתַקִּיפָא
יַתִּירָא וְשִׁנַּיִ דִּי־פַרְזֶל לַהּ
רַבְרְבָן אָכְלָה וּמַדֱּקָה וּשְׁאָרָא 1 בְּרַגְלַיַּהּ 2 בְּרַגְלַהּ
רָפְסָה וְהִיא מְשַׁנְּיָה מִנ־כָּל־חֵיוָתָא
דִּי קָדָיהּ וְקַרְנַיִן עֲשַׂר לַהּ׃
Dan 7.8
מִשְׂתַּכַּל הֲוֵית בְּקַרְנַיָּא וַאֲלוּ
קֶרֶן אָחֳרִי זְעֵירָה סִלְקָת 1 בֵּינֵיהוֺן 2 בֵּינֵיהֵן
וּתְלָת מִנ־קַרְנַיָּא קַדְמָיָתָא 1 אֶתְעֲקַרוּ 2 אֶתְעֲקַרָה
מִנ־קֳדָמַיַּהּ 2 קֳדָמַהּ וַאֲלוּ עַיְנִין
כְּעַיְנֵי אֲנָשָׁא בְּקַרְנָא־דָא וּפֻם
מְמַלִּל רַבְרְבָן׃
Dan 7.9
חָזֵה הֲוֵית עַד דִּי כָרְסָוָן
רְמִיו וְעַתִּיק יֺומִין יְתִב
לְבוּשֵׁהּ כִּתְלַג חִוָּר וּשְׂעַר רֵאשֵׁהּ
כַּעֲמַר נְקֵא כָּרְסְיֵהּ שְׁבִיבִין
דִּי־נוּר גַּלְגִּלּוֺהִי נוּר דָּלִק׃
Dan 7.10
נְהַר דִּי־נוּר נָגֵד וְנָפֵק מִנ־קֳדָמוֺהִי
אֶלֶף 1 אַלְפַיִם 2 אַלְפִין יְשַׁמְּשׁוּנֵּהּ
וְרִבּוֺ 1 רַבְּוָן 2 רִבְבָן קָדָמוֺהִי
יְקוּמוּן דִּינָא תִב וְסִפְרִין
פְּתִיחוּ׃
Dan 7.11
חָזֵה הֲוֵית בֵּאדַיִן מִנ־קָל
מִלַּיָּא רַבְרְבָתָא דִּי קַרְנָא מְמַלֱּלָה
חָזֵה הֲוֵית עַד דִּי קְטִילַת
חֵיוְתָא וְהוּבַד גִּשְׁמַהּ וִיהִיבַת
לִיקֵדַת אֶשָּׁא׃
Dan 7.12
וּשְׁאָר חֵיוָתָא הֶעְדִּיו שָׁלְטָנְהוֺן
וְאַרְכָה בְחַיִּין יְהִיבַת לְהוֺן
עַד־זְמַן וְעִדָּן׃
Dan 7.13
חָזֵה הֲוֵית בְּחֶזְוֵי לֵילְיָא
וַאֲרוּ עִמ־עֲנָנֵי שְׁמַיָּא כְּבַר
אֱנָשׁ אָתֵה הֲוָה וְעַד־עַתִּיק
יֺומַיָּא מְטָה וּקְדָמוֺהִי הַקְרְוּהִי׃
Dan 7.14
וְלֵהּ יְהִיב שָׁלְטָן וִיקָר וּמַלְכוּ
וְכֹל עַמְמַיָּא אֻמַיָּא וְלִשָּׁנַיָּא
לֵהּ יִפְלְחוּן שָׁלְטָנֵהּ שָׁלְטָן
עָלַם דִּי־לָא יֶעְדֵּה וּמַלְכוּתֵהּ
דִּי־לָא תִתְחַבַּל׃ ף
Dan 7.15
אֶתְכְּרִיַּת רוּחִי אֲנָה דָנִיֵּאל
בְּגֺוא נִדְנֶה וְחֶזְוֵי רֵאשִׁי
יְבַהֲלֻנַּנִי׃
Dan 7.16
קִרְבֵת עַל־חַד מִנ־קָאֲמַיָּא וְיַצִּיבָא
אֶבְעֵא־מִנֵּהּ עַל־כָּל־דְּנָה וַאֲמַר־לִי
וּפְשַׁר מִלַּיָּא יְהוֺדְעִנַּנִי׃
Dan 7.17
אִלֵּין חֵיוָתָא רַבְרְבָתָא דִּי
אִנִּין אַרְבַּע אַרְבְּעָה מַלְכִין
יְקוּמוּן מִנ־אַרְעָא׃
Dan 7.18
וִיקַבְּלוּן מַלְכוּתָא קַדִּישֵׁי
עֶלְיֺונִין וְיַחְסְנוּן מַלְכוּתָא
עַד־עָלְמָא וְעַד עָלַם עָלְמַיָּא׃
Dan 7.19
אֱדַיִן צְבִית לְיַצָּבָא עַל־חֵיוְתָא
רְבִיעָיְתָא דִּי־הֲוָת שָׁנְיָה מִנ־כָּלְּהוֺן 2 כָּלְּהֵין
דְּחִילָה יַתִּירָה 1 שִׁנַּיַּהּ 2 שִׁנַּהּ
יּ־פַרְזֶל וְטִפְרַיהּ דִּי־נְחָשׁ
אָכְלָה מַדֲּקָה וּשְׁאָרָא בְּרַגְלַיהּ
רָפְסָה׃
Dan 7.20
וְעַל־קַרְנַיָּא עֲשַׂר דִּי בְרֵאשַׁהּ
וְאָחֳרִי דִּי סִלְקַת 1 וּנְפַלוּ 2 וּנְפַלָה
מִנ־קֳדָמַיַּהּ 2 קֳדָמַהּ תְּלָת וְקַרְנָא
דִכֵּן וְעַיְנִיּן לַהּ וְפֻם מְמַלִּל
רַבְרְבָן וְחֶזְוַהּ רַב מִנ־חַבְרָתַהּ׃
Dan 7.21
חָזֵה הֲוֵית וְקַרְנָא דִכֵּן עָבְדָה
קְרָב עִמ־קַדִּישִׁין וְיָכְלָה לְהוֺן׃
Dan 7.22
עַד דִּי אֲתָה עַתִּיק יֺומַיָּא
וְדִינָא יְהִב לְקַדִּישֵׁי עֶלְיֺונִין
וְזִמְנָא מְטָה וּמַלְכוּתָא הֶחֱסִנוּ
קַדִּישִׁין׃
Dan 7.23
כֵּן אֲמַר חֵיוְתָא רְבִיעָיְתָא
מַלְכוּ 1 רְבִיעָיָא 2 רְבִיעָאָה תֶּהֱוֵא
בְאַרְעָא דִּי תִשְׁנֵא מִנ־כָּל־מַלְכְוָתָא
וְתֵאכֻל כָּל־אַרְעָא וּתְוּשִׁנַּהּ
וְתַדְּקִנַּהּ׃
Dan 7.24
וְקַרְנַיָּא עֲשַׂר מִנַּהּ מַלְכוּתָה
עַשְׂרָה מַלְכִין יְקֻמוּן וְאָחֳרָן
יְקוּם אַחֲרֵיהוֺן וְהוּא יִשְׁנֵא
מִנ־קַדְמָיֵא וּתְלָתָה מַלְכִין
יְשְׁפִּל׃
Dan 7.25
וּמִלִּין לְצַד 1 עִלָּיָא 2 עִלָּאָה יְמַלִּל
וּלְקַדִּישֵׁי עֶלְיֺונִין יְבַלֵּא
וְיִסְבַּר לְהַשְׁנָיָה זִמְנִין וְדָת
וְיִתְיַהֲבוּן בִּידֵהּ עַד־עִדָּן
וְעִדָּנִין וּפְלַג עִדָּן׃
Dan 7.26
וְדִינָא יִתִּב וְשָׁלְטָנֵהּ יְהַעְדּוֺן
לְהַשְׁמָדָה וּלְהוֺבָדָה עַד־סוֺפָא׃
Dan 7.27
וּמַלְכוּתָה וְשָׁלְטָנָא וּרְבוּתָא
דִּי מַלְכְוָת תְּחוֺת כָּל־שְׁמַיָּא
יְהִיבַת לְעַם קַדִּישֵׁי עֶלְיֺונִין
מַלְכוּתֵהּ מַלְכוּת עָלַם וְכֹל
שָׁלְטָנַיָּא לֵהּ יִפְלְחוּן וְיִשְׁתַּמְּעוּן׃
Dan 7.28
עַד־כָּה סוֺפָא דִי־מִלְּתָא אֲנָה
דָנִיֵּאל שַׂגִּיא רַעְיֺונַי יְבַהֲלֻנַּנִי
וְזִיוַי יִשְׁתַּנֺּון עֲלַי וּמִלְּתָא
בְּלִבִּי נִטְרֵת׃ ף

 

 

Arcanum Újságok
Arcanum Újságok

Kíváncsi, mit írtak az újságok erről a temáról az elmúlt 250 évben?

Megnézem

Arcanum logo

Az Arcanum Adatbázis Kiadó Magyarország vezető tartalomszolgáltatója, 1989. január elsején kezdte meg működését. A cég kulturális tartalmak nagy tömegű digitalizálásával, adatbázisokba rendezésével és publikálásával foglalkozik.

Rólunk Kapcsolat Sajtószoba

Languages