Ez 27

Teljes szövegű keresés

Ez 27
Ez 27.1
וַיְהִי דְבַר־יְהוָה אֵלַי לֵאמֹר׃
Ez 27.2
וְאַתָּה בֶנ־אָדָם שָׂא עַל־צֹר
קִינָה׃
Ez 27.3
וְאָמַרְתָּ לְצוֺר 1 הַיֺּשְׁבֹתֵי 2 הַיֺּשֶׁבֶת
עַל־מְבוֺאֹת יָם רֹכֶלֶת הָעַמִּים
אֶל־אִיִּים רַבִּים כֹּה אָמַר
אֲדֹנָי יְהוִה צוֺר אַתְּ אָמַרְתְּ
אֲנִי כְּלִילַת יֺפִי׃
Ez 27.4
בְּלֵב יַמִּים גְּבוּלָיִך בֹּנַיִך
כָּלְלוּ יָפְיֵך׃
Ez 27.5
בְּרוֺשִׁים מִשְּׂנִיר בָּנוּ לָך אֵת
כָּל־לֻחֹתָיִם אֶרֶז מִלְּבָנֺון
לָקָחוּ לַעֲשׂוֺת תֹּרֶן עָלָיִך׃
Ez 27.6
אַלּוֺנִים מִבָּשָׁן עָשׂוּ מִשּׁוֺטָיִך
קַרְשֵׁך עָשׂוּ־שֵׁן בַּת־אֲשֻׁרִים
מֵאִיֵּי 1 כִּתִּיִּם 2 כִּתִּיִּים׃
Ez 27.7
שֵׁשׁ־בְּרִקְמָה מִמִּצְרַיִם הָיָה מִפְרָשֵׂך
לִהְיֺות לָך לְנֵס תְּכֵלֶת וְאַרְגָּמָן
מֵאִיֵּי אֱלִישָׁה הָיָה מְכַסֵּך׃
Ez 27.8
יֺשְׁבֵי צִידוֺן וְאַרְוַד הָיוּ
שָׁטִים לָך חֲכָמַיִך צוֺר הָיוּ
בָך הֵמָּה חֹבְלָיִך׃
Ez 27.9
זִקְנֵי גְבַל וַחֲכָמֶיהָ הָיוּ בָך
מַחֲזִיקֵי בִּדְקֵך כָּל־אֳנִיֺּות
הַיָּם וּמַלָּחֵיהֶם הָיוּ בָך לַעֲרֹב
מַעֲרָבֵך׃
Ez 27.10
פָּרַס וְלוּד וּפוּט הָיוּ בְחֵילֵך
אַנְשֵׁי מִלְחַמְתֵּך מָגֵן וְכוֺבַע
תִּלּוּ־בָך הֵמָּה נָתְנוּ הֲדָרֵך׃
Ez 27.11
בְּנֵי אַרְוַד וְחֵילֵך עַל־חוֺמוֺתַיִך
סָבִיב וְגַמָּדִים בְּמִגְדְּלוֺתַיִך
הָיוּ שִׁלְטֵיהֶם תִּלּוּ עַל־חוֺמוֺתַיִך
סָבִיב הֵמָּה כָּלְל יָפְיֵך׃
Ez 27.12
תַּרְשִׁישׁ סֹחַרְתֵּך מֵרֹב כָּל־הוֺן
בְּכֶסֶף בַּרְזֶל בְּדִיל וְעוֺפֶרֶת
נָתְנוּ עִזְבוֺנָיִך׃
Ez 27.13
יָוָן תֻּבַל וָמֶשֶׁך הֵמָּה רֹכְלָיִך
בְּנֶפֶשׁ אָדָם וּכְלֵי נְחֹשֶׁת נָתְנוּ
מַעֲרָבֵך׃
Ez 27.14
מִבֵּית תּוֺגַרְמָה סוּסִים וּפָרָשִׁים
וּפְרָדִים נָתְנוּ עִזְבוֺנָיִך׃
Ez 27.15
בְּנֵי דְדָן רֹכְלַיִך אִיִּים רַבִּים
סְחֹרַת יָדֵך קַרְנֺות שֵׁן 1 וְהוֺבְנִים 2 וְהָבְנִים
הֵשִׁיבוּ אֶשְׁכָּרֵך׃
Ez 27.16
אֲרָם סֹחַרְתֵּך מֵרֹב מַעֲשָׂיִך בְּנֺפֶך
אַרְגָּמָן וְרִקְמָה וּבוּץ וְרָאמֹת
וְכַדְכֹּד נָתְנוּ בְּעִזְבוֺנָיִך׃
Ez 27.17
יְהוּדָה וְאֶרֶץ יִשְׂרָאֵל הֵמָּה
רֹכְלָיִך בְּחִטֵּי מִנִּית וּפַנַּג
וּדְבַשׁ וָשֶׁמֶן וָצֹרִי נָתְנוּ מַעֲרָבֵך׃
Ez 27.18
דַּמֶּשֶׂק סֹחַרְתֵּך בְּרֹב מַעֲשַׂיִך
מֵרֹב כָּל־הוֺן בְּיֵין חֶלְבּוֺן
וְצֶמֶר צָחַר׃
Ez 27.19
וְדָן וְיָוָן מְאוּזָּל בְּעִזְבוֺנַיִך
נָתָנּוּ בַּרְזֶל עָשׁוֺת קִדָּה וְקָנֶה
בְּמַעֲרָבֵך הָיָה׃
Ez 27.20
דְּדָן רֹכַלְתֵּך בְבִגְדֵי־חֹפֶשׁ לְרִכְבָּה׃
Ez 27.21
עֲרַב וְכָל־נְשִׂיאֵי קֵדָר הֵמָּה
סֹחֲרֵי יָדֵך בְּכָרִים וְאֵילִים
וְעַתּוּדִים בָּם סֹחֲרָיִך׃
Ez 27.22
רֹכְלֵי שְׁבָא וְרַעְמָה הֵמָּה רֹכְלָיִך
בְּרֹאשׁ כָּל־בֹּשֶׂם וּבְכָל־אֶבֶן
יְקָרָה וְזָהָב נָתְנוּ עִזְבוֺנָיִך׃
Ez 27.23
חָרָן וְכַנֵּה וָעֶדֶן רֹכְלֵי שְׁבָא
אַשּׁוּר כִּלְמַד רֹכַלְתֵּך׃
Ez 27.24
הֵמָּה רֹכְלַיִך בְמַכְלֻלִים בִּגְלוֺמֵי
תְּכֵלֶת וְרִקְמָה וּבְגִנְזֵי בְּרֹמִים
בַּחֲבָלִים חֲבֻשִׁים וַאֲרֻזִים בְּמַרְכֻלְתֵּך׃
Ez 27.25
אֳנִיֺּות תַּרְשִׁישׁ שָׁרוֺתַיִך מַעֲרָבֵך
וַתִּמָּלְאִי וַתִּכְבְּדִי מְאֹד בְּלֵב־יַמִּים׃
Ez 27.26
בְּמַיִם רַבִּים הֱבִיאוּך הַשָּׁטִים
אֹתָך רוּחַ הַקָּדִים שְׁבָרֵך בְּלֵב
יַמִּים׃
Ez 27.27
הוֺנֵך וְעִזְבוֺנַיִך מַעֲרָבֵך מַלָּחַיִך
וְחֹבְלָיִך מַחֲזִיקֵי בִדְקֵד וְעֹרְבֵי
מַעֲרָבֵך וְכָל־אַנְשֵׁי מִלְחַמְתֵּך
אֲשֶׁר־בָּך וּבְכָ־קְהָלֵך אֲשֶׁר בְּתוֺכֵך
יִפְּלוּ בְּלֵב יַמִּים בְּיֺום מַפַּלְתֵּך׃
Ez 27.28
לְקוֺל זַעֲקַת חֹבְלָיִך יִרְעֲשׁוּ
מִגְרֹשׁוֺת׃
Ez 27.29
וְיָרְדוּ מֵאָנִיֺּותֵיהֶם כֹּל תֹּפְשֵׂי
מָשׁוֺט מַלָּחִים כֹּל חֹבְלֵי הַיָּם
אֶל־הָאָרֶץ יַעֲמֹדוּ׃
Ez 27.30
וְהִשְׁמִיעוּ עָלַיִך בְּקוֺלָם וְיִזְעֲקוּ
מָרָה וְיַעֲלוּ עָפָר עַל־רָאשֵׁיהֶם
בָּאֵפֶר יִתְפַּלָּשׁוּ׃
Ez 27.31
וְהִקְרִיחוּ אֵלַיִך קָרְחָה וְחָגְרוּ
שַׂקִּים וּבָכוּ אֵלַיִך בְּמַר־נֶפֶשׁ
מִסְפֵּד מָר׃
Ez 27.32
וְנָשְׂאוּ אֵלַיִך בְּנִיהֶם קִינָה
וְקוֺנְנוּ עָלָיִך מִי כְצוֺר
כְּדֻמָה בְּתוֺך הַיָּם׃
Ez 27.33
בְּצֵאת עִזְבוֺנַיִך מִיַּמִּים הִשְׂבַּעַתְּ
עַמִּים רַבִּים בְּרֹב הוֺנַיִך וּמַעֲרָבַיִך
הֶעֱשַׁרְתְּ מַלְכֵי־אָרֶץ׃
Ez 27.34
עֵת נִשְׁבֶּרֶת מִיַּמִּים בְּמַעֲמַקֵּי־מָיִם
מַעֲרָבֵך וְכָל־קְהָלֵך בְּתוֺכֵך
נָפָלוּ׃
Ez 27.35
כֹּל יֺשְׁבֵי הָאִיִּים שָׁמְמוּ עָלָיִך
וּמַלְכֵיהֶם שָׂעֲרוּ שַׂעַר רָעֲמוּ
פָּנִים׃
Ez 27.36
סֹחֲרִים בָּעַמִּים שָׁרְקוּ עָלָיִך
בַּלָּהוֺת הָיִית וְאֵינֵך עַד־עוֺלָם׃
ס

 

 

Arcanum Újságok
Arcanum Újságok

Kíváncsi, mit írtak az újságok erről a temáról az elmúlt 250 évben?

Megnézem

Arcanum logo

Az Arcanum Adatbázis Kiadó Magyarország vezető tartalomszolgáltatója, 1989. január elsején kezdte meg működését. A cég kulturális tartalmak nagy tömegű digitalizálásával, adatbázisokba rendezésével és publikálásával foglalkozik.

Rólunk Kapcsolat Sajtószoba

Languages