Jes 22

Teljes szövegű keresés

Jes 22
Jes 22.1
מַשָּׂא גֵּיא חִזָּיֺון מַה־לָּך
אֵפוֺא כִּי־עָלִית כֻּלָּך לַגַּגֺּות׃
Jes 22.2
תְּשֻׁאוֺת מְלֵאָה עִיר הוֺמִיָּה
קִרְיָה עַלִּיזָה חֲלָלַיִך לֹא
חַלְלֵי־חֶרֶב וְלֹא מֵתֵי מִלְחָמָה׃
Jes 22.3
כָּל־קְצִינַיִך נָדְדוּ־יַחַד מִקֶּשֶׁת
אֻסָּרוּ כָּל־נִמְצָאַיִך אֻסְּרוּ
יַחְדָּו מֵרָחוֺק בָּרָחוּ׃
Jes 22.4
עַל־כֵּן אָמַרְתִּי שְׁעוּ מִנִּי אֲמָרֵר
בַּבֶּכִי אַל־תָּאִיצוּ לְנַחֲמֵנִי
עַל־שֹׁד בַּת־עַמִּי׃
Jes 22.5
כִּי יֺום מְהוּמָה וּמְבוּסָה וּמְבוּכָה
לַאדֹנָי יְהוִה צְבָאוֺת בְּגֵיא
חִזָּיֺון מְקַרְקַר קִר וְשׁוֺעַ אֶל־הָהָר׃
Jes 22.6
וְעֵילָם נָשָׂא אַשְׁפָּה בְּרֶכֶב אָדָם
פָּרָשִׁים וְקִיר עֵרָה מָגֵן׃
Jes 22.7
וַיְהִי מִבְחַר־עֲמָקַיִך מָלְאוּ
רָכֶב וְהַפָּרָשִׁים שֹׁת שָׁתוּ הַשָּׁעְרָה׃
Jes 22.8
וַיְגַל אֵת מָסַך יְהוּדָה וַתַּבֵּט
בַּיֺּום הַהוּא אֶל־נֶשֶׁק בֵּית
הַיָּעַר׃
Jes 22.9
וְאֵת בְּקִיעֵי עִיר־דָּוִד רְאִיתֶם
כִּי־רָבּוּ וַתְּקַבְּצוּ אֶת־מֵי
הַבְּרֵכָה הַתַּחְתּוֺנָה׃
Jes 22.10
וְאֶת־בָּתֵּי יְרוּשָׁלִַם סְפַרְתֶּם
וַתִּתְֶצוּ הַבָּתִּים לְבַצֵּר הַחוֺמָה׃
Jes 22.11
וּמִקְוָה עֲשִׂיתֶם בֵּין הַחֹמֹתַיִם
לְמֵי הַבְּרֵכָה הַיְשָׁנָה וְלֹא
הִבַּטְתֶּם אֶל־עֹשֶׂיהָ וְיֺצְרָהּ מֵרָחוֺק
לֹא רְאִיתֶם׃
Jes 22.12
וַיִּקְרָא אֲדֹנָי יְהוִה צְבָאוֺת
בַּיֺּום הַהוּא לִבְכִי וּלְמִסְפֵּד
וּלְקָרְחָה וְלַחֲגֺר שָׂק׃
Jes 22.13
וְהִנֵּה שָׂשׂוֺן וְשִׂמְחָה הָרֹג בָּקָר
וְשָׁחֹט צֹאן אָכֹל בָּשָׂר וְשָׁתוֺת
יָיִן אָכוֺל וְשָׁתוֺ כִּי מָחָר
נָמוּת׃
Jes 22.14
וְנִגְלָה בְאָזְנָי יְהוָה צְבָאוֺת
אִמ־יְכֻפַּר הֶעָוֺן הַזֶּה לָכֶם
עַד־תְּמֻתוּן אָמַר אֲדֹנָי יְהוִה
צְבָאוֺת׃ ף
Jes 22.15
כֹּה אָמַר אֲדֹנָי יְהוִה צְבָאוֺת
לֶכְ־בֹּא אֶל־הַסֹּכֵן הַזֶּה עַל־שֶׁבְנָא
אֲשֶׁר עַל־הַבָּיִת׃
Jes 22.16
מַה־לְּךָ פֹה וּמִי לְךָ פֹה כִּי־חָצַבְתָּ
לְּךָ פֹּה קָבֶר חֹצְבִי מָרוֺם
קִבְרוֺ חֹקְקִי בַסֶּלַע מִשְׁכָּן לוֺ׃
Jes 22.17
הִנֵּה יְהוָה מְטַלְטֶלְךָ טַלְטֵלָה
גָּבֶר וְעֹטְךָ עָטֹה׃
Jes 22.18
צָנֺוף יִצְנָפְךָ צְנֵפָה כַּדּוּר
אֶל־אֶרֶץ רַחֲבַת יָדָיִם שָׁמָּה
תָמוּת וְשָׁמָּה מַרְכְּבוֺת כְּבוֺדֶךָ
קְלוֺן בֵּית אֲדֹנֶיךָ׃
Jes 22.19
וַהֲדַפְתִּיךָ מִמַּצָּבֶךָ וּמִמַּעֲמָדְךָ
יֶהֶרְסֶךָ׃
Jes 22.20
וְהָיָה בַּיֺּום הַהוּא וְקָרָאתִי
לְעַבְדִּי לְאֶלְיָקִים בֶּנ־חִלְקִיָּהוּ׃
Jes 22.21
וְהִלְבַּשְׁתִּיו כֻּתָּנְתֶּךָ וְאַבְנֵטְךָ
אֲחַזְּקֶנּוּ וּמֶמְשֶׁלְתְּךָ אֶתֵּן בְּיָדוֺ
וְהָיָה לְאָב לְיֺושֵׁב יְרוּשָׁלִַם
וּלְבֵית יְהוּדָה׃
Jes 22.22
וְנָתַתִּי מַפְתֵּחַ בֵּית־דָּוִד עַל־שִׁכְמוֺ
וּפָתַח וְאֵין סֹגֵר וְסָגַר וְאֵין
פֹּתֵחַ׃
Jes 22.23
וּתְקַעְתִּיו יָתֵד בְּמָקוֺם נֶאֱמָן
וְהָיָה לְכִסֵּא כָבוֺד לְבֵית אָבִיו׃
Jes 22.24
וְתָלוּ עָלָיו כֹּל כְּבוֺד בֵּית־אָבִיו
הַצֶּאֱצָאִים וְהַצְּפִעוֺת כֹּל כְּלֵי
הַקָּטָן מִכְּלֵי הָאַגָּנֺות וְעַד
כָּל־כְּלֵי הַנְּבָלִים׃
Jes 22.25
בַּיֺּום הַהוּא נְאֻם יְהוָה צְבָאוֺת
תָּמוּשׁ הַיָּתֵד הַתְּקוּעָה בְּמָקוֺם
נֶאֱמָן וְנִגְדְּעָה וְנָפְלָה וְנִכְרַת
הַמַּשָּׂא אֲשֶׁר־עָלֶיהָ כִּי יְהוָה
דִּבֵּר׃ ס

 

 

Arcanum Újságok
Arcanum Újságok

Kíváncsi, mit írtak az újságok erről a temáról az elmúlt 250 évben?

Megnézem

Arcanum logo

Az Arcanum Adatbázis Kiadó Magyarország vezető tartalomszolgáltatója, 1989. január elsején kezdte meg működését. A cég kulturális tartalmak nagy tömegű digitalizálásával, adatbázisokba rendezésével és publikálásával foglalkozik.

Rólunk Kapcsolat Sajtószoba

Languages