Ps 96
Ps 96
Ps 96.1
Dominus regnavit exultabit terra laetabuntur insulae multae
Ps 96.2
nubes et caligo in circuitu eius iustitia et iudicium firmamentum solii eius
Ps 96.3
ignis ante faciem eius ibit et exuret per circuitum hostes eius
Ps 96.4
apparuerunt fulgora eius orbi vidit et contremuit terra
Ps 96.5
montes sicut cera tabefacti sunt a facie Domini a facie dominatoris omnis terrae
Ps 96.6
adnuntiaverunt caeli iustitiam eius et viderunt omnes populi gloriam eius
Ps 96.7
confundantur universi qui serviunt sculptili qui gloriantur in idolis adorate eum omnes dii
Ps 96.8
audivit et laetata est Sion et exultaverunt filiae Iudae propter iudicia tua Domine
Ps 96.9
tu enim Dominus Excelsus super omnem terram vehementer elevatus es super universos deos
Ps 96.10
qui diligitis Dominum odite malum custodit animas sanctorum suorum de manu impiorum eruet eos
Ps 96.11
lux orta est iusto et rectis corde laetitia
Ps 96.12
laetamini iusti in Domino et confitemini memoriae sanctae eius
