Ps 88
Ps 88
Ps 88.1
eruditionis Aethan Ezraitae
Ps 88.2
misericordias Domini in aeternum cantabo in generatione et generatione adnuntiabo veritatem tuam in ore meo
Ps 88.3
quia dixisti sempiterna misericordia aedificabitur caelos fundabis et veritas tua in eis
Ps 88.4
percussi foedus cum electo meo iuravi David servo meo
Ps 88.5
usque in aeternum stabiliam semen tuum et aedificabo in generationem et generationem thronum tuum semper
Ps 88.6
confitebuntur caeli mirabilia tua Domine et veritatem tuam in ecclesia sanctorum
Ps 88.7
quis enim in nubibus adaequabitur Domino adsimilabitur Domino de filiis Dei
Ps 88.8
Deus inclitus in arcano sanctorum nimio et terribilis in cunctis qui circum eum sunt
Ps 88.9
Domine Deus exercituum quis similis tui fortissime Domine et veritas tua in circuitu tuo
Ps 88.10
tu dominaris superbiae maris et elationes gurgitum eius tu conprimis
Ps 88.11
tu confregisti quasi vulneratum superbum in brachio forti tuo dispersisti inimicos tuos
Ps 88.12
tui sunt caeli et tua est terra orbem et plenitudinem eius tu fundasti
Ps 88.13
aquilonem et dexteram tu creasti Thabor et Hermon nomen tuum laudabunt
Ps 88.14
tuum brachium cum fortitudine roboretur manus tua exaltetur dextera tua
Ps 88.15
iustitia et iudicium firmamentum throni tui misericordia et veritas praecedent faciem tuam
Ps 88.16
beatus populus qui novit iubilum Domine in lumine vultus tui ambulabunt
Ps 88.17
in nomine tuo exultabunt tota die et in iustitia tua exaltabuntur
Ps 88.18
quia gloria fortitudinis eorum tu es et in misericordia tua elevabis cornu nostrum
Ps 88.19
quia a Domino est protectio nostra et a Sancto Israhel rege nostro
Ps 88.20
tunc locutus es per visionem sanctis tuis et dixisti posui adiutorium super robustum exaltavi electum de populo
Ps 88.21
inveni David servum meum oleo sancto meo unxi eum
Ps 88.22
cum quo manus mea firma erit et brachium meum roborabit eum
Ps 88.23
non decipiet inimicus eum et filius iniquitatis non adfliget eum
Ps 88.24
sed concidam ante faciem eius hostes illius et qui eum oderunt percutiam
Ps 88.25
veritas autem mea et misericordia mea erit cum eo et in nomine meo exaltabitur cornu eius
Ps 88.26
et ponam in mari manum eius et in fluminibus dexteram eius
Ps 88.27
ipse vocabit me pater meus es tu Deus meus et fortitudo salutis meae
Ps 88.28
ego autem primogenitum ponam eum excelsum regibus terrae
Ps 88.29
in aeternum custodiam ei misericordiam meam et pactum meum fidele ei erit
Ps 88.30
et ponam perpetuum semen eius et thronum eius sicut dies caeli
Ps 88.31
si autem dereliquerint filii eius legem meam et in iudiciis meis non ambulaverint
Ps 88.32
si caerimonias meas profanaverint et praecepta mea non custodierint
Ps 88.33
visitabo in virga scelera eorum et in plagis iniquitatem eorum
Ps 88.34
misericordiam autem meam non auferam ab eo nec mentiar in veritate mea
Ps 88.35
non violabo pactum meum et quod egressum est de labiis meis non mutabo
Ps 88.36
semel iuravi in sancto meo ne David mentiar
Ps 88.37
semen eius in sempiternum erit
Ps 88.38
et thronus eius sicut sol in conspectu meo sicut luna stabilietur in sempiternum et testis in caelo fidelis semper
Ps 88.39
tu autem reppulisti et proiecisti iratus es adversum christum tuum
Ps 88.40
adtenuasti pactum servi tui profanasti in terra diadema eius
Ps 88.41
dissipasti omnes macerias eius posuisti munitiones eius pavorem
Ps 88.42
diripuerunt eum omnes qui transeunt per viam factus est obprobrium vicinis suis
Ps 88.43
elevasti dexteram hostium eius laetificasti omnes inimicos illius
Ps 88.44
avertisti robur gladii eius et non sublevasti eum in proelio
Ps 88.45
quiescere fecisti munditiam eius et thronum illius in terram detraxisti
Ps 88.46
adbreviasti dies adulescentiae eius operuisti eum ignominia sempiterna
Ps 88.47
usquequo Domine absconderis in finem succendetur quasi ignis indignatio tua
Ps 88.48
memento mei de profundo alioquin quare frustra creasti filios hominum
Ps 88.49
quis est vir qui vivat et non videat mortem salvans animam suam de manu inferi semper
Ps 88.50
ubi sunt misericordiae tuae antiquae Domine quas iurasti David in veritate tua
Ps 88.51
recordare Domine obprobrii servorum tuorum quia portavi in sinu meo omnes iniquitates populorum
Ps 88.52
quas exprobraverunt inimici tui Domine quibus exprobraverunt vestigia christi tui
Ps 88.53
benedictus Dominus in sempiternum amen et amen
