Ps 83
Ps 83
Ps 83.1
victori pro torculari filiorum Core canticum
Ps 83.2
quam dilecta tabernacula tua Domine exercituum
Ps 83.3
desiderat et defecit anima mea in atria Domini cor meum et caro mea laudabunt Deum viventem
Ps 83.4
siquidem avis invenit domum et passer nidum sibi ubi ponat pullos suos altaria tua Domine exercituum rex meus et Deus meus
Ps 83.5
beati qui habitant in domo tua adhuc laudabunt te semper
Ps 83.6
beatus homo cuius fortitudo est in te semitae in corde eius
Ps 83.7
transeuntes in valle fletus fontem ponent eam
Ps 83.8
benedictione quoque amicietur doctor ibunt de fortitudine in fortitudinem parebunt apud Deum in Sion
Ps 83.9
Domine Deus exercituum exaudi orationem meam ausculta Deus Iacob semper
Ps 83.10
clipeus noster vide Deus et adtende faciem christi tui
Ps 83.11
quoniam melior est dies in atriis tuis super milia elegi abiectus esse in domo Dei mei magis quam habitare in tabernaculis impietatis
Ps 83.12
quia sol et scutum Dominus Deus gratiam et gloriam dabit Dominus
Ps 83.13
nec prohibebit bonum ab his qui ambulant in perfectione Domine exercituum beatus homo qui confidet in te
