Ps 70
Ps 70
Ps 70.1
in te Domine speravi ne confundar in aeternum
Ps 70.2
iustitia tua erue me et libera inclina ad me aurem tuam et salva me
Ps 70.3
esto mihi robustum habitaculum ut ingrediar iugiter praecepisti ut salvares me quia petra mea et fortitudo mea es tu
Ps 70.4
Deus meus salva me de manu impii de manu iniqui et nocentis
Ps 70.5
quia tu es expectatio mea Deus Domine fiducia mea ab adulescentia mea
Ps 70.6
a te sustentatus sum ex utero de ventre matris meae tu es protector meus in te laus mea semper
Ps 70.7
quasi portentum factus sum multis et tu spes mea fortissima
Ps 70.8
impleatur os meum laude tua tota die magnitudine tua
Ps 70.9
ne proicias me in tempore senectutis cum defecerit fortitudo mea ne derelinquas me
Ps 70.10
quia dixerunt inimici mei mihi et qui observabant animam meam inierunt consilium pariter
Ps 70.11
dicentes Deus dereliquit eum persequimini et conprehendite eum quia non est qui eruat
Ps 70.12
Deus ne elongeris a me Deus meus ad auxiliandum mihi festina
Ps 70.13
confundantur et consumantur adversarii animae meae operiantur obprobrio et confusione qui quaerunt malum mihi
Ps 70.14
ego autem iugiter expectabo et adiciam super omnes laudationes tuas
Ps 70.15
os meum narrabit iustitiam tuam tota die salutare tuum quia non cognovi litteraturas
Ps 70.16
ingrediar in fortitudine Domini Dei recordabor iustitiae tuae solius
Ps 70.17
Deus docuisti me ab adulescentia mea et usque nunc adnuntiabo mirabilia tua
Ps 70.18
insuper et usque ad senectutem et canos Deus ne derelinquas me donec adnuntiem brachium tuum generationi cunctisque qui venturi sunt fortitudines tuas
Ps 70.19
et iustitiam tuam Deus usque in excelsum quanta fecisti magnalia Deus quis similis tibi
Ps 70.20
qui ostendisti mihi tribulationes plurimas et adflictiones conversus vivificabis nos et de abyssis terrae rursum educes nos
Ps 70.21
multiplicabis magnitudinem meam et conversus consolaberis me
Ps 70.22
ego autem confitebor tibi in vasis psalterii veritatem tuam Deus meus cantabo tibi in cithara Sancte Israhel
Ps 70.23
laudabunt labia mea cum cantavero tibi et anima mea quam redemisti
Ps 70.24
insuper et lingua mea tota die meditabitur iustitiam tuam quia confusi sunt et dehonestati quaerentes malum mihi
