Ps 68
Ps 68
Ps 68.1
victori pro liliis David
Ps 68.2
salva me Deus quoniam venerunt aquae usque ad animam
Ps 68.3
infixus sum in limo profundi et non possum consistere veni in profundum aquarum et flumen operuit me
Ps 68.4
laboravi clamans exasperatum est guttur meum defecerunt oculi mei expectantes Deum meum
Ps 68.5
multiplicati sunt super capillos capitis mei qui oderunt me gratis confortati sunt qui persequebantur me inimici mei iniuste quae non rapueram tunc reddebam
Ps 68.6
Deus tu scis stultitiam meam et peccata mea a te non sunt abscondita
Ps 68.7
non confundantur in me qui expectant te Domine Deus exercituum non confundantur in me qui quaerunt te Deus Israhel
Ps 68.8
quia propter te portavi obprobrium operuit confusio faciem meam
Ps 68.9
alienus factus sum fratribus meis et peregrinus filiis matris meae
Ps 68.10
quia zelus domus tuae comedit me et obprobrium exprobrantium tibi cecidit super me
Ps 68.11
et flevi in ieiunio animam meam et factum est in obprobria mihi
Ps 68.12
et posui vestimentum meum saccum et factus sum eis in parabulam
Ps 68.13
contra me loquebantur qui sedebant in porta et cantabant bibentes vinum
Ps 68.14
mea autem oratio ad te Domine tempus reconciliationis est Deus in multitudine misericordiae tuae exaudi me in veritate salutaris tui
Ps 68.15
erue me de luto ut non infigar libera me ab his qui oderunt me et de profundis aquis
Ps 68.16
ne operiat me fluvius aquae et ne absorbeat me profundum et non coronet super me puteus os suum
Ps 68.17
exaudi me Domine quoniam bona est misericordia tua secundum multitudinem miserationum tuarum respice ad me
Ps 68.18
et ne abscondas faciem tuam a servo tuo quoniam tribulor cito exaudi me
Ps 68.19
accede ad animam meam redime eam propter inimicos meos libera me
Ps 68.20
tu scis obprobrium meum et confusionem meam et ignominiam meam
Ps 68.21
coram te sunt omnes hostes mei obprobrio contritum est cor meum et desperatus sum et expectavi qui contristaretur et non fuit et qui consolaretur et non inveni
Ps 68.22
et dederunt in esca mea fel et in siti mea potaverunt me aceto
Ps 68.23
sit mensa eorum coram eis in laqueum et in retributiones ad corruendum
Ps 68.24
contenebrentur oculi eorum ne videant et dorsum eorum semper incurva
Ps 68.25
effunde super eos indignationem tuam et ira furoris tui conprehendat eos
Ps 68.26
fiat commoratio eorum deserta in tabernaculis eorum non sit qui habitet
Ps 68.27
quoniam quem tu percussisti persecuti sunt et ut adfligerent vulneratos tuos narrabant
Ps 68.28
da iniquitatem super iniquitatem eorum et non veniant in iustitia tua
Ps 68.29
deleantur de libro viventium et cum iustis non scribantur
Ps 68.30
ego autem pauper et dolens salus tua Deus suscipiet me
Ps 68.31
laudabo nomen Dei in cantico et magnificabo eum in confessione
Ps 68.32
et placebit Domino super vitulum novellum cornua efferentem et ungulas
Ps 68.33
videntes mansueti laetabuntur qui quaeritis Deum vivet anima vestra
Ps 68.34
quoniam exaudivit pauperes Dominus et vinctos suos non dispexit
Ps 68.35
laudent eum caeli et terra maria et omne quod movetur in eis
Ps 68.36
quia Deus salvabit Sion et aedificabit civitates Iuda et habitabunt ibi et possidebunt eam
Ps 68.37
et semen servorum eius possidebit eam et qui diligunt nomen eius habitabunt in ea
