Ps 57
Ps 57
Ps 57.1
victori ut non disperdas David humilem et simplicem
Ps 57.2
si vere utique iustitiam loquimini recta iudicate filii hominum
Ps 57.3
etenim in corde iniquitates operamini in terra iniquitatis manus vestras adpendite
Ps 57.4
alienati sunt peccatores a vulva erraverunt ab utero loquentes mendacium
Ps 57.5
furor eorum sicut furor serpentis sicut reguli surdi obturantis aurem suam
Ps 57.6
ut non audiat vocem murmurantium nec incantatoris incantationes callidas
Ps 57.7
Deus excute dentes eorum ex ore eorum molares leonum confringe Domine
Ps 57.8
dissolvantur quasi aquae quae defluent intendet arcum suum donec conterantur
Ps 57.9
quasi vermis tabefactus pertranseant quasi abortivum mulieris quod non vidit solem
Ps 57.10
antequam crescant spinae vestrae in ramnum quasi viventes quasi in ira tempestas rapiet eas
Ps 57.11
laetabitur iustus cum viderit ultionem pedes suos lavabit in sanguinem impii
Ps 57.12
et dicet homo vere fructus est iusto vere est Deus iudicans in terra
