Ps 41
Ps 41
Ps 41.1
pro victoria doctissimi filiorum Core
Ps 41.2
sicut areola praeparata ad inrigationes aquarum sic anima mea praeparata est ad te Deus
Ps 41.3
sitivit anima mea Deum fortem viventem quando veniam et parebo ante faciem tuam
Ps 41.4
fuerunt mihi lacrimae meae panis per diem ac noctem cum diceretur mihi tota die ubi est Deus tuus
Ps 41.5
horum recordatus sum et effudi in me animam meam quia veniam ad umbraculum tacebo usque ad domum Dei in voce laudis et confessionis multitudinis festa celebrantis
Ps 41.6
quare incurvaris anima mea et conturbas me expecta Dominum quia adhuc confitebor ei salutaribus vultus eius
Ps 41.7
Deus meus in memet ipso anima mea incurvatur propterea recordabor tui de terra Iordanis et Hermoniim de monte minimo
Ps 41.8
abyssus abyssum vocat in voce cataractarum tuarum omnes gurgites tui et fluctus tui super me transierunt
Ps 41.9
per diem mandavit Dominus misericordiam suam et in nocte canticum eius mecum oratio Deo vitae meae
Ps 41.10
dicam Deo petra mea quare oblitus es mei quare tristis incedo adfligente inimico
Ps 41.11
cum me interficerent in ossibus meis exprobraverunt mihi hostes mei dicentes tota die ubi est Deus tuus
Ps 41.12
quare incurvaris anima mea et conturbas me expecta Dominum quoniam adhuc confitebor ei salutibus vultus mei et Deo meo
