Ps 39
Ps 39
Ps 39.1
pro victoria David canticum
Ps 39.2
expectans expectavi Dominum et inclinatus est ad me
Ps 39.3
et audivit clamorem meum et eduxit me de lacu famoso de luto caeni et statuit super petram pedes meos stabilivit gressus meos
Ps 39.4
et dedit in ore meo canticum novum laudem Deo nostro videbunt multi et timebunt et sperabunt in Domino
Ps 39.5
beatus vir qui posuit Dominum confidentiam suam et non est aversus ad superbias pompasque mendacii
Ps 39.6
multa fecisti tu Domine Deus meus mirabilia tua et cogitationes tuas pro nobis non invenio ordinem coram te si narrare voluero et numerare plura sunt quam ut narrari queant
Ps 39.7
victima et oblatione non indiges aures fodisti mihi holocaustum et pro peccato non petisti
Ps 39.8
tunc dixi ecce venio in volumine libri scriptum est de me
Ps 39.9
ut facerem placitum tibi Deus meus volui et legem tuam in medio ventris mei
Ps 39.10
adnuntiavi iustum in ecclesia multa ecce labia mea non prohibebo Domine tu nosti
Ps 39.11
iustitiam tuam non abscondi in medio cordis mei fidem tuam et salutare tuum dixi non abscondi misericordiam tuam et veritatem tuam in ecclesia multa
Ps 39.12
tu Domine non prohibebis misericordias tuas a me misericordia tua et veritas iugiter servabunt me
Ps 39.13
circumdederunt enim me mala quorum non est numerus conprehenderunt me iniquitates meae et non potui videre plures factae sunt quam capilli capitis mei et cor meum dereliquit me
Ps 39.14
placeat tibi Domine ut liberes me Domine ad adiuvandum me festina
Ps 39.15
confundantur et revereantur simul quaerentes animam meam ut auferant eam convertantur retrorsum et confundantur qui volunt mala mihi
Ps 39.16
pereant post confusionem suam qui dicunt mihi va va
Ps 39.17
gaudeant et laetentur in te qui quaerunt te dicant iugiter magnificetur Dominus qui diligunt salutare tuum
Ps 39.18
ego autem sum egens et pauper Dominus sollicitus erit pro me auxilium meum et salutare meum tu Deus meus ne moreris
