Ps 37
Ps 37
Ps 37.1
canticum David in commemoratione
Ps 37.2
Domine ne in ira tua arguas me neque in furore tuo corripias me
Ps 37.3
quia sagittae tuae infixae sunt mihi et tetigit me manus tua
Ps 37.4
non est sanitas in carne mea a facie indignationis tuae non est pax ossibus meis a facie peccati mei
Ps 37.5
quia iniquitates meae transierunt caput meum quasi onus grave adgravatae sunt super me
Ps 37.6
conputruerunt et tabuerunt cicatrices meae a facie insipientiae meae
Ps 37.7
adflictus sum et incurvatus nimis tota die maerens ambulabam
Ps 37.8
quia lumbi mei repleti sunt ignominia et non est sanitas in carne mea
Ps 37.9
evigilavi et adflictus sum nimis rugiebam a gemitu cordis mei
Ps 37.10
Domine in conspectu tuo omne desiderium meum et gemitus meus a te non est absconditus
Ps 37.11
cor meum fluctuabat dereliquit me fortitudo mea et lux oculorum meorum etiam ipsa non est mecum
Ps 37.12
cari mei et amici mei quasi contra lepram meam steterunt et vicini mei longe steterunt
Ps 37.13
et inruebant quaerentes animam meam et investigantes mala mihi loquebantur insidias et dolos tota die meditabantur
Ps 37.14
ego autem quasi surdus non audiebam et quasi mutus non aperiebam os meum
Ps 37.15
et eram quasi homo non audiens nec habens in ore suo redargutiones
Ps 37.16
te enim Domine expectabam tu exaudies Domine Deus meus
Ps 37.17
quia dixi ne forte insultent mihi et cum vacillaverint pedes mei super me magnificentur
Ps 37.18
quia ego ad plagas paratus et dolor meus contra me est semper
Ps 37.19
quia iniquitatem meam adnuntio sollicitus ero pro peccato meo
Ps 37.20
inimici autem mei viventes confortati sunt et multiplicati sunt odientes me mendaciter
Ps 37.21
et qui reddunt malum pro bono adversabantur mihi quia sequebar bonum
Ps 37.22
ne derelinquas me Domine Deus meus ne elongeris a me
Ps 37.23
festina in auxilium meum Domine salutis meae
