Ps 34
Ps 34
Ps 34.1
David iudica Domine adversarios meos pugna contra pugnantes me
Ps 34.2
adprehende scutum et hastam et consurge in auxilium meum
Ps 34.3
evagina gladium et praeoccupa ex adverso persequentem me dic animae meae salus tua ego sum
Ps 34.4
confundantur et revereantur qui quaerunt animam meam convertantur retrorsum et confundantur qui cogitant malum mihi
Ps 34.5
fiant sicut pulvis ante faciem venti et angelus Domini inpellat
Ps 34.6
sit via eorum tenebrae et lubricum et angelus Domini persequatur eos
Ps 34.7
quia frustra absconderunt mihi insidias retis sui sine causa foderunt animae meae
Ps 34.8
veniat ei calamitas quam ignorat et rete suum quod abscondit conprehendat eum et cadat in laqueum
Ps 34.9
anima autem mea exultabit in Domino et laetabitur in salute sua
Ps 34.10
omnia ossa mea dicent Domine quis similis tui eruens inopem a validiore et pauperem et mendicum a violento
Ps 34.11
surgentes testes iniqui quae nesciebam interrogabant me
Ps 34.12
reddebant mihi mala pro bono sterilitatem animae meae
Ps 34.13
ego autem cum infirmarer ab eis induebar cilicio humiliabam in ieiunio animam meam et oratio mea ad sinum meum revertetur
Ps 34.14
quasi ad amicum quasi ad fratrem meum sic ambulabam quasi lugens mater tristis incurvabar
Ps 34.15
et in infirmitate mea laetabantur et congregabantur collecti sunt adversum me percutientes et nesciebam
Ps 34.16
scindentes et non tacentes in simulatione verborum fictorum frendebant contra me dentibus suis
Ps 34.17
Domine quanta aspicies converte animam meam a calamitatibus suis a leonibus solitariam meam
Ps 34.18
confitebor tibi in ecclesia grandi in populo forti laudabo te
Ps 34.19
non laetentur super me inimici mei mendaces odientes me frustra coniventes oculo
Ps 34.20
non enim pacem loquuntur sed in rapina terrae verba fraudulenta concinnant
Ps 34.21
et dilataverunt super me os suum dixerunt va va vidit oculus noster
Ps 34.22
vidisti Domine ne taceas Domine ne elongeris a me
Ps 34.23
consurge et evigila in iudicium meum Deus meus et Domine in causam meam
Ps 34.24
iudica me secundum iustitiam meam Domine Deus meus et ne insultent mihi
Ps 34.25
ne dicant in corde suo va va va animae nostrae ne dicant absorbuimus eum
Ps 34.26
confundantur et revereantur pariter qui laetantur in adflictione mea induantur confusione et verecundia qui magnificantur super me
Ps 34.27
laudent et laetentur qui volunt iustitiam meam et dicant semper magnificetur Dominus qui vult pacem servi sui
Ps 34.28
et lingua mea meditabitur iustitiam tuam tota die laudem tuam
