Ps 21
Ps 21
Ps 21.1
victori pro cervo matutino canticum
Ps 21.2
Deus Deus meus quare dereliquisti me longe a salute mea verba rugitus mei
Ps 21.3
Deus meus clamabo per diem et non exaudies et nocte nec est silentium mihi
Ps 21.4
et tu sancte habitator Laus Israhel
Ps 21.5
in te confisi sunt patres nostri confisi sunt et salvasti eos
Ps 21.6
ad te clamaverunt et salvati sunt in te confisi sunt et non sunt confusi
Ps 21.7
ego autem sum vermis et non homo obprobrium hominum et dispectio plebis
Ps 21.8
omnes videntes me subsannant me dimittunt labium movent caput
Ps 21.9
confugit ad Dominum salvet eum liberet eum quoniam vult eum
Ps 21.10
tu autem propugnator meus ex utero fiducia mea ab uberibus matris meae
Ps 21.11
in te proiectus sum ex vulva de ventre matris meae Deus meus es tu
Ps 21.12
ne longe fias a me quoniam tribulatio proxima est quoniam non est adiutor
Ps 21.13
circumdederunt me vituli multi tauri pingues vallaverunt me
Ps 21.14
aperuerunt super me os suum quasi leo capiens et rugiens
Ps 21.15
sicut aqua effusus sum et separata sunt omnia ossa mea factum est cor meum sicut cera liquefacta in medio ventris mei
Ps 21.16
aruit velut testa fortitudo mea et lingua mea adhesit palato meo et in pulverem mortis detraxisti me
Ps 21.17
circumdederunt me venatores concilium pessimorum vallavit me vinxerunt manus meas et pedes meos
Ps 21.18
numeravi omnia ossa mea quae ipsi respicientes viderunt in me
Ps 21.19
diviserunt vestimenta mea sibi et super vestimentum meum miserunt sortem
Ps 21.20
tu autem Domine ne longe fias fortitudo mea in auxilium meum festina
Ps 21.21
erue a gladio animam meam de manu canis solitariam meam
Ps 21.22
salva me ex ore leonis et de cornibus unicornium exaudi me
Ps 21.23
narrabo nomen tuum fratribus meis in medio ecclesiae laudabo te
Ps 21.24
qui timetis Dominum laudate eum omne semen Iacob glorificate eum
Ps 21.25
et metuite eum universum semen Israhel quoniam non dispexit neque contempsit modestiam pauperis et non abscondit faciem suam ab eo et cum clamaret ad eum audivit
Ps 21.26
apud te laus mea in ecclesia multa vota mea reddam in conspectu timentium eum
Ps 21.27
comedent mites et saturabuntur laudabunt Dominum quaerentes eum vivet cor vestrum in sempiternum
Ps 21.28
recordabuntur et convertentur ad Dominum omnes fines terrae et adorabunt coram eo universae cognationes gentium
Ps 21.29
quia Domini est regnum et dominabitur gentibus
Ps 21.30
comederunt et adoraverunt omnes pingues terrae ante faciem eius curvabunt genu universi qui descendunt in pulverem
Ps 21.31
et anima eius ipsi vivet semen serviet ei
Ps 21.32
narrabitur Domino in generatione venient et adnuntiabunt iustitias eius populo qui nascetur quas fecit
