Prov 19

Teljes szövegű keresés

Prov 19
Prov 19.1
melior est pauper qui ambulat in simplicitate sua quam torquens labia insipiens
Prov 19.2
ubi non est scientia animae non est bonum et qui festinus est pedibus offendit
Prov 19.3
stultitia hominis subplantat gressus eius et contra Deum fervet animo suo
Prov 19.4
divitiae addunt amicos plurimos a paupere autem et hii quos habuit separantur
Prov 19.5
testis falsus non erit inpunitus et qui mendacia loquitur non effugiet
Prov 19.6
multi colunt personam potentis et amici sunt dona tribuenti
Prov 19.7
fratres hominis pauperis oderunt eum insuper et amici procul recesserunt ab eo qui tantum verba sectatur nihil habebit
Prov 19.8
qui autem possessor est mentis diligit animam suam et custos prudentiae inveniet bona
Prov 19.9
testis falsus non erit inpunitus et qui loquitur mendacia peribit
Prov 19.10
non decent stultum deliciae nec servum dominari principibus
Prov 19.11
doctrina viri per patientiam noscitur et gloria eius est iniqua praetergredi
Prov 19.12
sicut fremitus leonis ita et regis ira et sicut ros super herbam ita hilaritas eius
Prov 19.13
dolor patris filius stultus et tecta iugiter perstillantia litigiosa mulier
Prov 19.14
domus et divitiae dantur a patribus a Domino autem proprie uxor prudens
Prov 19.15
pigredo inmittit soporem et anima dissoluta esuriet
Prov 19.16
qui custodit mandatum custodit animam suam qui autem neglegit vias suas mortificabitur
Prov 19.17
feneratur Domino qui miseretur pauperis et vicissitudinem suam reddet ei
Prov 19.18
erudi filium tuum ne desperes ad interfectionem autem eius ne ponas animam tuam
Prov 19.19
qui inpatiens est sustinebit damnum et cum rapuerit aliud adponet
Prov 19.20
audi consilium et suscipe disciplinam ut sis sapiens in novissimis tuis
Prov 19.21
multae cogitationes in corde viri voluntas autem Domini permanebit
Prov 19.22
homo indigens misericors est et melior pauper quam vir mendax
Prov 19.23
timor Domini ad vitam et in plenitudine commorabitur absque visitatione pessimi
Prov 19.24
abscondit piger manum suam sub ascella nec ad os suum adplicat eam
Prov 19.25
pestilente flagellato stultus sapientior erit sin autem corripueris sapientem intelleget disciplinam
Prov 19.26
qui adfligit patrem et fugat matrem ignominiosus est et infelix
Prov 19.27
non cesses fili audire doctrinam nec ignores sermones scientiae
Prov 19.28
testis iniquus deridet iudicium et os impiorum devorat iniquitatem
Prov 19.29
parata sunt derisoribus iudicia et mallei percutientes stultorum corporibus

 

 

A témában további forrásokat talál az Arcanum Digitális Tudománytárban

ÉRDEKEL A TÖBBI TALÁLAT