Ga 6

Teljes szövegű keresés

Ga 6
Ga 6.1
fratres et si praeoccupatus fuerit homo in aliquo delicto vos qui spiritales estis huiusmodi instruite in spiritu lenitatis considerans te ipsum ne et tu tempteris
Ga 6.2
alter alterius onera portate et sic adimplebitis legem Christi
Ga 6.3
nam si quis existimat se aliquid esse cum sit nihil ipse se seducit
Ga 6.4
opus autem suum probet unusquisque et sic in semet ipso tantum gloriam habebit et non in altero
Ga 6.5
unusquisque enim onus suum portabit
Ga 6.6
communicet autem is qui catecizatur verbum ei qui se catecizat in omnibus bonis
Ga 6.7
nolite errare Deus non inridetur
Ga 6.8
quae enim seminaverit homo haec et metet quoniam qui seminat in carne sua de carne et metet corruptionem qui autem seminat in spiritu de spiritu metet vitam aeternam
Ga 6.9
bonum autem facientes non deficiamus tempore enim suo metemus non deficientes
Ga 6.10
ergo dum tempus habemus operemur bonum ad omnes maxime autem ad domesticos fidei
Ga 6.11
videte qualibus litteris scripsi vobis mea manu
Ga 6.12
quicumque volunt placere in carne hii cogunt vos circumcidi tantum ut crucis Christi persecutionem non patiantur
Ga 6.13
neque enim qui circumciduntur legem custodiunt sed volunt vos circumcidi ut in carne vestra glorientur
Ga 6.14
mihi autem absit gloriari nisi in cruce Domini nostri Iesu Christi per quem mihi mundus crucifixus est et ego mundo
Ga 6.15
in Christo enim Iesu neque circumcisio aliquid valet neque praeputium sed nova creatura
Ga 6.16
et quicumque hanc regulam secuti fuerint pax super illos et misericordia et super Israhel Dei
Ga 6.17
de cetero nemo mihi molestus sit ego enim stigmata Iesu in corpore meo porto
Ga 6.18
gratia Domini nostri Iesu Christi cum spiritu vestro fratres amen

 

 

A témában további forrásokat talál az Arcanum Digitális Tudománytárban

ÉRDEKEL A TÖBBI TALÁLAT