Ps 80

Teljes szövegű keresés

Ps 80
Ps 80.1
לַמְנַצֵּחַ אֶל־שֹׁשַׁנִּים עֵדוּת לְאָסָף
מִזְמוֺר׃
Ps 80.2
רֹעֵה יִשְׂרָאֵל הַאֲזִינָה נֺהֵג
כַּצֹּאן יֺוסֵף יֺשֵׁב הַכְּרוּבִים
הוֺפִיעָה׃
Ps 80.3
לִפְנֵי אֶפְרַיִם וּבִנְיָמִן וּמְנַשֶּׁה
עוֺרְרָה אֶת־גְּבוּרָתֶךָ וּלְכָה
לִישֻׁעָתָה לָּנוּ׃
Ps 80.4
אֱלֹהִים הֲשִׁיבֵנוּ וְהָאֵר פָּנֶיךָ
וְנִוָּשֵׁעָה׃
Ps 80.5
יְהוָה אֱלֹהִים צְבָאוֺת עַד־מָתַי
עָשַׁנְתָּ בִּתְפִלַּת עַמֶּךָ׃
Ps 80.6
הֶאֱכַלְתָּם לֶחֶם דִּמְעָה וַתַּשְׁקֵמוֺ
בִּדְמָעוֺת שָׁלִישׁ׃
Ps 80.7
תְּשִׂימֵנוּ מָדוֺן לִשְׁכֵנֵינוּ וְאֹיְבֵינוּ
יִלְעֲגוּ־לָמוֺ׃
Ps 80.8
אֱלֹהִים צְבָאוֺת הֲשִׁיבֵנוּ וְהָאֵר
פָּנֶיךָ וְנִוָּשֵׁעָה׃
Ps 80.9
גֶּפֶן מִמִּצְרַיִם תַּסִּיעַ תְּגָרֵשׁ
גֺּויִם וַתִּטָּעֶהָ׃
Ps 80.10
פִּנִּיתָ לְפָנֶיהָ וַתַּשְׁרֵשׁ שָׁרָשֶׁיהָ
וַתְּמַלֵּא־אָרֶץ׃
Ps 80.11
כָּסּוּ הָרִים צִלָּהּ וַעֲנָפֶיהָ אַרְזֵי־אֵל׃
Ps 80.12
תְּשַׁלַּח קְצִירֶהָ עַד־יָם וְאֶל־נָהָר
יֺונְקוֺתֶיהָ׃
Ps 80.13
לָמָּה פָּרַצְתָּ גְדֵרֶיהָ וְאָרוּהָ
כָּל־עֹבְרֵי דָרֶך׃
Ps 80.14
יְכַרְסְמֶנָּה חֲזִיר מִיָּעַר וְזִיז
שָׂדַי יִרְעֶנָּה׃
Ps 80.15
אֱלֹהִים צְבָאוֺת שׁוּב־נָא הַבֵּט
מִשָּׁמַיִם וּרְאֵה וּפְקֹד גֶּפֶן
זֺאת׃
Ps 80.16
וְכַנָּה אֲשֶׁר־נָטְעָה יְמִינֶךָ
וְעַל־בֵּן אִמַּצְתָּה לָּך׃
Ps 80.17
שְׂרֻפָה בָאֵשׁ כְּסוּחָה מִגַּעֲרַת
פָּנֶיךָ יֺאבֵדוּ׃
Ps 80.18
תְּהִי־יָדְךָ עַל־אִישׁ יְמִינֶךָ
עַל־בֶּנ־אָדָם אִמַּצְתָּ לָּך׃
Ps 80.19
וְלֹא־נָסוֺג מִמֶּךָּ תְּחַיֵּנוּ וּבְשִׁמְךָ
נִקְרָא׃
Ps 80.20
יְהוָה אֱלֹהִים צְבָאוֺת הֲשִׁיבֵנוּ
הָאֵר פָּנֶיךָ וְנִוָּשֵׁעָה׃

 

 

A témában további forrásokat talál az Arcanum Digitális Tudománytárban

ÉRDEKEL A TÖBBI TALÁLAT