Hos 14

Teljes szövegű keresés

Hos 14
Hos 14.1
תֶּאְשַׁם שֹׁמְרוֺן כִּי מָרְתָה בֵּאלֹהֶיהָ
בַּחֶרֶב יִפֹּלוּ עֹלְלֵיהֶם יְרֻטָּשׁוּ
וְהָרִיֺּותָיו יְבֻקָּעוּ׃ ף
Hos 14.2
שׁוּבָה יִשְׂרָאֵל עַד יְהוָה אֱלֹהֶיךָ
כִּי כָשַׁלְתָּ בַּעֲוֺנֶךָ׃
Hos 14.3
קְחוּ עִמָּכֶם דְּבָרִים וְשׁוּבוּ
אֶל־יְהוָה אִמְרוּ אֵלָיו כָּל־תִּשָּׂא
עָוֺן וְקַח־טוֺב וּנְשַׁלְּמָה פָרִים
שְׂפָתֵינוּ׃
Hos 14.4
אַשּׁוּר לֹא יֺושִׁיעֵנוּ עַל־סוּס
לֹא נִרְכָּב וְלֹא־נֺאמַר עוֺד
אֱלֹהֵינוּ לְמַעֲשֵׂה יָדֵינוּ אֲשֶׁר־בְּךָ
יְרֻחַם יָתוֺם׃
Hos 14.5
אֶרְפָּא מְשׁוּבָתָם אֹהֲבֵם נְדָבָה
כִּי שָׁב אַפִּי מִמֶּנּוּ׃
Hos 14.6
אֶהְיֶה כַטַּל לְיִשְׂרָאֵל יִפְרַח
כַּשּׁוֺשַׁנָּה וְיַך שָׁרָשָׁיו כַּלְּבָנֺון׃
Hos 14.7
יֵלְכוּ יֺנְקוֺתָיו וִיהִי כַזַּיִת
הוֺדוֺ וְרֵיחַ לוֺ כַּלְּבָנֺון׃
Hos 14.8
יָשֻׁבוּ יֺשְׁבֵי בְצִלּוֺ יְחַיּוּ דָגָן
וְיִפְרְחוּ כַגָּפֶן זִכְרוֺ כְּיֵין
לְבָנֺון׃ ס
Hos 14.9
אֶפְרַיִם מַה־לִּי עוֺד לָעֲצַבִּים
אֲנִי עָנִיתִי וַאֲשׁוּרֶנּוּ אֲנִי
כִּבְרוֺשׁ רַעֲנָן מִמֶּנִּי פֶּרְיְךָ
נִמְצָא׃
Hos 14.10
מִי חָכָם וְיָבֵן אֵלֶּה נָבוֺן
וְיֵדָעֵם כִּי־יְשָׁרִים דַּרְכֵי
יְהוָה וְצַדִּקִים יֵלְכוּ בָם
וּפֹשְׁעִים יִכָּשְׁלוּ בָם׃

 

 

A témában további forrásokat talál az Arcanum Digitális Tudománytárban

ÉRDEKEL A TÖBBI TALÁLAT