Ac 9

Full text search

Ac 9
Ac 9.1
Saulus autem adhuc inspirans minarum et caedis in discipulos Domini accessit ad principem sacerdotum
Ac 9.2
et petiit ab eo epistulas in Damascum ad synagogas ut si quos invenisset huius viae viros ac mulieres vinctos perduceret in Hierusalem
Ac 9.3
et cum iter faceret contigit ut adpropinquaret Damasco et subito circumfulsit eum lux de caelo
Ac 9.4
et cadens in terram audivit vocem dicentem sibi Saule Saule quid me persequeris
Ac 9.5
qui dixit quis es Domine et ille ego sum Iesus quem tu persequeris
Ac 9.6
 
Ac 9.7
sed surge et ingredere civitatem et dicetur tibi quid te oporteat facere viri autem illi qui comitabantur cum eo stabant stupefacti audientes quidem vocem neminem autem videntes
Ac 9.8
surrexit autem Saulus de terra apertisque oculis nihil videbat ad manus autem illum trahentes introduxerunt Damascum
Ac 9.9
et erat tribus diebus non videns et non manducavit neque bibit
Ac 9.10
erat autem quidam discipulus Damasci nomine Ananias et dixit ad illum in visu Dominus Anania at ille ait ecce ego Domine
Ac 9.11
et Dominus ad illum surgens vade in vicum qui vocatur Rectus et quaere in domo Iudae Saulum nomine Tarsensem ecce enim orat
Ac 9.12
et vidit virum Ananiam nomine introeuntem et inponentem sibi manus ut visum recipiat
Ac 9.13
respondit autem Ananias Domine audivi a multis de viro hoc quanta mala sanctis tuis fecerit in Hierusalem
Ac 9.14
et hic habet potestatem a principibus sacerdotum alligandi omnes qui invocant nomen tuum
Ac 9.15
dixit autem ad eum Dominus vade quoniam vas electionis est mihi iste ut portet nomen meum coram gentibus et regibus et filiis Israhel
Ac 9.16
ego enim ostendam illi quanta oporteat eum pro nomine meo pati
Ac 9.17
et abiit Ananias et introivit in domum et inponens ei manus dixit Saule frater Dominus misit me Iesus qui apparuit tibi in via qua veniebas ut videas et implearis Spiritu Sancto
Ac 9.18
et confestim ceciderunt ab oculis eius tamquam squamae et visum recepit et surgens baptizatus est
Ac 9.19
et cum accepisset cibum confortatus est fuit autem cum discipulis qui erant Damasci per dies aliquot
Ac 9.20
et continuo in synagogis praedicabat Iesum quoniam hic est Filius Dei
Ac 9.21
stupebant autem omnes qui audiebant et dicebant nonne hic est qui expugnabat in Hierusalem eos qui invocabant nomen istud et huc ad hoc venit ut vinctos illos duceret ad principes sacerdotum
Ac 9.22
Saulus autem magis convalescebat et confundebat Iudaeos qui habitabant Damasci adfirmans quoniam hic est Christus
Ac 9.23
cum implerentur autem dies multi consilium fecerunt Iudaei ut eum interficerent
Ac 9.24
notae autem factae sunt Saulo insidiae eorum custodiebant autem et portas die ac nocte ut eum interficerent
Ac 9.25
accipientes autem discipuli eius nocte per murum dimiserunt eum submittentes in sporta
Ac 9.26
cum autem venisset in Hierusalem temptabat iungere se discipulis et omnes timebant eum non credentes quia esset discipulus
Ac 9.27
Barnabas autem adprehensum illum duxit ad apostolos et narravit illis quomodo in via vidisset Dominum et quia locutus est ei et quomodo in Damasco fiducialiter egerit in nomine Iesu
Ac 9.28
et erat cum illis intrans et exiens in Hierusalem et fiducialiter agens in nomine Domini
Ac 9.29
loquebatur quoque et disputabat cum Graecis illi autem quaerebant occidere eum
Ac 9.30
quod cum cognovissent fratres deduxerunt eum Caesaream et dimiserunt Tarsum
Ac 9.31
ecclesia quidem per totam Iudaeam et Galilaeam et Samariam habebat pacem et aedificabatur ambulans in timore Domini et consolatione Sancti Spiritus replebatur
Ac 9.32
factum est autem Petrum dum pertransiret universos devenire et ad sanctos qui habitabant Lyddae
Ac 9.33
invenit autem ibi hominem quendam nomine Aeneam ab annis octo iacentem in grabatto qui erat paralyticus
Ac 9.34
et ait illi Petrus Aeneas sanat te Iesus Christus surge et sterne tibi et continuo surrexit
Ac 9.35
et viderunt illum omnes qui habitabant Lyddae et Saronae qui conversi sunt ad Dominum
Ac 9.36
in Ioppe autem fuit quaedam discipula nomine Tabitas quae interpretata dicitur Dorcas haec erat plena operibus bonis et elemosynis quas faciebat
Ac 9.37
factum est autem in diebus illis ut infirmata moreretur quam cum lavissent posuerunt eam in cenaculo
Ac 9.38
cum autem prope esset Lydda ab Ioppe discipuli audientes quia Petrus esset in ea miserunt duos viros ad eum rogantes ne pigriteris venire usque ad nos
Ac 9.39
exsurgens autem Petrus venit cum illis et cum advenisset duxerunt illum in cenaculum et circumsteterunt illum omnes viduae flentes et ostendentes tunicas et vestes quas faciebat illis Dorcas
Ac 9.40
eiectis autem omnibus foras Petrus ponens genua oravit et conversus ad corpus dixit Tabita surge at illa aperuit oculos suos et viso Petro resedit
Ac 9.41
dans autem illi manum erexit eam et cum vocasset sanctos et viduas adsignavit eam vivam
Ac 9.42
notum autem factum est per universam Ioppen et crediderunt multi in Domino
Ac 9.43
factum est autem ut dies multos moraretur in Ioppe apud quendam Simonem coriarium

 

 

Arcanum Newspapers
Arcanum Newspapers

See what the newspapers have said about this subject in the last 250 years!

Show me

Arcanum logo

Arcanum is an online publisher that creates massive structured databases of digitized cultural contents.

The Company Contact Press room

Languages