Lc 24

Full text search

Lc 24
Lc 24.1
una autem sabbati valde diluculo venerunt ad monumentum portantes quae paraverant aromata
Lc 24.2
et invenerunt lapidem revolutum a monumento
Lc 24.3
et ingressae non invenerunt corpus Domini Iesu
Lc 24.4
et factum est dum mente consternatae essent de isto ecce duo viri steterunt secus illas in veste fulgenti
Lc 24.5
cum timerent autem et declinarent vultum in terram dixerunt ad illas quid quaeritis viventem cum mortuis
Lc 24.6
non est hic sed surrexit recordamini qualiter locutus est vobis cum adhuc in Galilaea esset
Lc 24.7
dicens quia oportet Filium hominis tradi in manus hominum peccatorum et crucifigi et die tertia resurgere
Lc 24.8
et recordatae sunt verborum eius
Lc 24.9
et regressae a monumento nuntiaverunt haec omnia illis undecim et ceteris omnibus
Lc 24.10
erat autem Maria Magdalene et Iohanna et Maria Iacobi et ceterae quae cum eis erant quae dicebant ad apostolos haec
Lc 24.11
et visa sunt ante illos sicut deliramentum verba ista et non credebant illis
Lc 24.12
Petrus autem surgens cucurrit ad monumentum et procumbens videt linteamina sola posita et abiit secum mirans quod factum fuerat
Lc 24.13
et ecce duo ex illis ibant ipsa die in castellum quod erat in spatio stadiorum sexaginta ab Hierusalem nomine Emmaus
Lc 24.14
et ipsi loquebantur ad invicem de his omnibus quae acciderant
Lc 24.15
et factum est dum fabularentur et secum quaererent et ipse Iesus adpropinquans ibat cum illis
Lc 24.16
oculi autem illorum tenebantur ne eum agnoscerent
Lc 24.17
et ait ad illos qui sunt hii sermones quos confertis ad invicem ambulantes et estis tristes
Lc 24.18
et respondens unus cui nomen Cleopas dixit ei tu solus peregrinus es in Hierusalem et non cognovisti quae facta sunt in illa his diebus
Lc 24.19
quibus ille dixit quae et dixerunt de Iesu Nazareno qui fuit vir propheta potens in opere et sermone coram Deo et omni populo
Lc 24.20
et quomodo eum tradiderunt summi sacerdotum et principes nostri in damnationem mortis et crucifixerunt eum
Lc 24.21
nos autem sperabamus quia ipse esset redempturus Israhel et nunc super haec omnia tertia dies hodie quod haec facta sunt
Lc 24.22
sed et mulieres quaedam ex nostris terruerunt nos quae ante lucem fuerunt ad monumentum
Lc 24.23
et non invento corpore eius venerunt dicentes se etiam visionem angelorum vidisse qui dicunt eum vivere
Lc 24.24
et abierunt quidam ex nostris ad monumentum et ita invenerunt sicut mulieres dixerunt ipsum vero non viderunt
Lc 24.25
et ipse dixit ad eos o stulti et tardi corde ad credendum in omnibus quae locuti sunt prophetae
Lc 24.26
nonne haec oportuit pati Christum et ita intrare in gloriam suam
Lc 24.27
et incipiens a Mose et omnibus prophetis interpretabatur illis in omnibus scripturis quae de ipso erant
Lc 24.28
et adpropinquaverunt castello quo ibant et ipse se finxit longius ire
Lc 24.29
et coegerunt illum dicentes mane nobiscum quoniam advesperascit et inclinata est iam dies et intravit cum illis
Lc 24.30
et factum est dum recumberet cum illis accepit panem et benedixit ac fregit et porrigebat illis
Lc 24.31
et aperti sunt oculi eorum et cognoverunt eum et ipse evanuit ex oculis eorum
Lc 24.32
et dixerunt ad invicem nonne cor nostrum ardens erat in nobis dum loqueretur in via et aperiret nobis scripturas
Lc 24.33
et surgentes eadem hora regressi sunt in Hierusalem et invenerunt congregatos undecim et eos qui cum ipsis erant
Lc 24.34
dicentes quod surrexit Dominus vere et apparuit Simoni
Lc 24.35
et ipsi narrabant quae gesta erant in via et quomodo cognoverunt eum in fractione panis
Lc 24.36
dum haec autem loquuntur Iesus stetit in medio eorum et dicit eis pax vobis ego sum nolite timere
Lc 24.37
conturbati vero et conterriti existimabant se spiritum videre
Lc 24.38
et dixit eis quid turbati estis et cogitationes ascendunt in corda vestra
Lc 24.39
videte manus meas et pedes quia ipse ego sum palpate et videte quia spiritus carnem et ossa non habet sicut me videtis habere
Lc 24.40
et cum hoc dixisset ostendit eis manus et pedes
Lc 24.41
adhuc autem illis non credentibus et mirantibus prae gaudio dixit habetis hic aliquid quod manducetur
Lc 24.42
at illi obtulerunt ei partem piscis assi et favum mellis
Lc 24.43
et cum manducasset coram eis sumens reliquias dedit eis
Lc 24.44
et dixit ad eos haec sunt verba quae locutus sum ad vos cum adhuc essem vobiscum quoniam necesse est impleri omnia quae scripta sunt in lege Mosi et prophetis et psalmis de me
Lc 24.45
tunc aperuit illis sensum ut intellegerent scripturas
Lc 24.46
et dixit eis quoniam sic scriptum est et sic oportebat Christum pati et resurgere a mortuis die tertia
Lc 24.47
et praedicari in nomine eius paenitentiam et remissionem peccatorum in omnes gentes incipientibus ab Hierosolyma
Lc 24.48
vos autem estis testes horum
Lc 24.49
et ego mitto promissum Patris mei in vos vos autem sedete in civitate quoadusque induamini virtutem ex alto
Lc 24.50
eduxit autem eos foras in Bethaniam et elevatis manibus suis benedixit eis
Lc 24.51
et factum est dum benediceret illis recessit ab eis et ferebatur in caelum
Lc 24.52
et ipsi adorantes regressi sunt in Hierusalem cum gaudio magno
Lc 24.53
et erant semper in templo laudantes et benedicentes Deum amen

 

 

Arcanum Newspapers
Arcanum Newspapers

See what the newspapers have said about this subject in the last 250 years!

Show me

Arcanum logo

Arcanum is an online publisher that creates massive structured databases of digitized cultural contents.

The Company Contact Press room

Languages