Lc 20

Full text search

Lc 20
Lc 20.1
et factum est in una dierum docente illo populum in templo et evangelizante convenerunt principes sacerdotum et scribae cum senioribus
Lc 20.2
et aiunt dicentes ad illum dic nobis in qua potestate haec facis aut quis est qui dedit tibi hanc potestatem
Lc 20.3
respondens autem dixit ad illos interrogabo vos et ego verbum respondete mihi
Lc 20.4
baptismum Iohannis de caelo erat an ex hominibus
Lc 20.5
at illi cogitabant inter se dicentes quia si dixerimus de caelo dicet quare ergo non credidistis illi
Lc 20.6
si autem dixerimus ex hominibus plebs universa lapidabit nos certi sunt enim Iohannem prophetam esse
Lc 20.7
et responderunt se nescire unde esset
Lc 20.8
et Iesus ait illis neque ego dico vobis in qua potestate haec facio
Lc 20.9
coepit autem dicere ad plebem parabolam hanc homo plantavit vineam et locavit eam colonis et ipse peregre fuit multis temporibus
Lc 20.10
et in tempore misit ad cultores servum ut de fructu vineae darent illi qui caesum dimiserunt eum inanem
Lc 20.11
et addidit alterum servum mittere illi autem hunc quoque caedentes et adficientes contumelia dimiserunt inanem
Lc 20.12
et addidit tertium mittere qui et illum vulnerantes eiecerunt
Lc 20.13
dixit autem dominus vineae quid faciam mittam filium meum dilectum forsitan cum hunc viderint verebuntur
Lc 20.14
quem cum vidissent coloni cogitaverunt inter se dicentes hic est heres occidamus illum ut nostra fiat hereditas
Lc 20.15
et eiectum illum extra vineam occiderunt quid ergo faciet illis dominus vineae
Lc 20.16
veniet et perdet colonos istos et dabit vineam aliis quo audito dixerunt illi absit
Lc 20.17
ille autem aspiciens eos ait quid est ergo hoc quod scriptum est lapidem quem reprobaverunt aedificantes hic factus est in caput anguli
Lc 20.18
omnis qui ceciderit supra illum lapidem conquassabitur supra quem autem ceciderit comminuet illum
Lc 20.19
et quaerebant principes sacerdotum et scribae mittere in illum manus illa hora et timuerunt populum cognoverunt enim quod ad ipsos dixerit similitudinem istam
Lc 20.20
et observantes miserunt insidiatores qui se iustos simularent ut caperent eum in sermone et traderent illum principatui et potestati praesidis
Lc 20.21
et interrogaverunt illum dicentes magister scimus quia recte dicis et doces et non accipis personam sed in veritate viam Dei doces
Lc 20.22
licet nobis dare tributum Caesari an non
Lc 20.23
considerans autem dolum illorum dixit ad eos quid me temptatis
Lc 20.24
ostendite mihi denarium cuius habet imaginem et inscriptionem respondentes dixerunt Caesaris
Lc 20.25
et ait illis reddite ergo quae Caesaris sunt Caesari et quae Dei sunt Deo
Lc 20.26
et non potuerunt verbum eius reprehendere coram plebe et mirati in responso eius tacuerunt
Lc 20.27
accesserunt autem quidam Sadducaeorum qui negant esse resurrectionem et interrogaverunt eum
Lc 20.28
dicentes magister Moses scripsit nobis si frater alicuius mortuus fuerit habens uxorem et hic sine filiis fuerit ut accipiat eam frater eius uxorem et suscitet semen fratri suo
Lc 20.29
septem ergo fratres erant et primus accepit uxorem et mortuus est sine filiis
Lc 20.30
et sequens accepit illam et ipse mortuus est sine filio
Lc 20.31
et tertius accepit illam similiter et omnes septem et non reliquerunt semen et mortui sunt
Lc 20.32
novissima omnium mortua est et mulier
Lc 20.33
in resurrectione ergo cuius eorum erit uxor siquidem septem habuerunt eam uxorem
Lc 20.34
et ait illis Iesus filii saeculi huius nubunt et traduntur ad nuptias
Lc 20.35
illi autem qui digni habebuntur saeculo illo et resurrectione ex mortuis neque nubunt neque ducunt uxores
Lc 20.36
neque enim ultra mori poterunt aequales enim angelis sunt et filii sunt Dei cum sint filii resurrectionis
Lc 20.37
quia vero resurgant mortui et Moses ostendit secus rubum sicut dicit Dominum Deum Abraham et Deum Isaac et Deum Iacob
Lc 20.38
Deus autem non est mortuorum sed vivorum omnes enim vivunt ei
Lc 20.39
respondentes autem quidam scribarum dixerunt magister bene dixisti
Lc 20.40
et amplius non audebant eum quicquam interrogare
Lc 20.41
dixit autem ad illos quomodo dicunt Christum Filium David esse
Lc 20.42
et ipse David dicit in libro Psalmorum dixit Dominus Domino meo sede a dextris meis
Lc 20.43
donec ponam inimicos tuos scabillum pedum tuorum
Lc 20.44
David ergo Dominum illum vocat et quomodo filius eius est
Lc 20.45
audiente autem omni populo dixit discipulis suis
Lc 20.46
adtendite a scribis qui volunt ambulare in stolis et amant salutationes in foro et primas cathedras in synagogis et primos discubitus in conviviis
Lc 20.47
qui devorant domos viduarum simulantes longam orationem hii accipient damnationem maiorem

 

 

Arcanum Newspapers
Arcanum Newspapers

See what the newspapers have said about this subject in the last 250 years!

Show me

Arcanum logo

Arcanum is an online publisher that creates massive structured databases of digitized cultural contents.

The Company Contact Press room

Languages