Mc 6

Full text search

Mc 6
Mc 6.1
et egressus inde abiit in patriam suam et sequebantur illum discipuli sui
Mc 6.2
et facto sabbato coepit in synagoga docere et multi audientes admirabantur in doctrina eius dicentes unde huic haec omnia et quae est sapientia quae data est illi et virtutes tales quae per manus eius efficiuntur
Mc 6.3
nonne iste est faber filius Mariae frater Iacobi et Ioseph et Iudae et Simonis nonne et sorores eius hic nobiscum sunt et scandalizabantur in illo
Mc 6.4
et dicebat eis Iesus quia non est propheta sine honore nisi in patria sua et in cognatione sua et in domo sua
Mc 6.5
et non poterat ibi virtutem ullam facere nisi paucos infirmos inpositis manibus curavit
Mc 6.6
et mirabatur propter incredulitatem eorum
Mc 6.7
et circumibat castella in circuitu docens et convocavit duodecim et coepit eos mittere binos et dabat illis potestatem spirituum inmundorum
Mc 6.8
et praecepit eis ne quid tollerent in via nisi virgam tantum non peram non panem neque in zona aes
Mc 6.9
sed calciatos sandaliis et ne induerentur duabus tunicis
Mc 6.10
et dicebat eis quocumque introieritis in domum illic manete donec exeatis inde
Mc 6.11
et quicumque non receperint vos nec audierint vos exeuntes inde excutite pulverem de pedibus vestris in testimonium illis
Mc 6.12
et exeuntes praedicabant ut paenitentiam agerent
Mc 6.13
et daemonia multa eiciebant et unguebant oleo multos aegrotos et sanabant
Mc 6.14
et audivit Herodes rex manifestum enim factum est nomen eius et dicebat quia Iohannes Baptista resurrexit a mortuis et propterea inoperantur virtutes in illo
Mc 6.15
alii autem dicebant quia Helias est alii vero dicebant propheta est quasi unus ex prophetis
Mc 6.16
quo audito Herodes ait quem ego decollavi Iohannem hic a mortuis resurrexit
Mc 6.17
ipse enim Herodes misit ac tenuit Iohannem et vinxit eum in carcere propter Herodiadem uxorem Philippi fratris sui quia duxerat eam
Mc 6.18
dicebat enim Iohannes Herodi non licet tibi habere uxorem fratris tui
Mc 6.19
Herodias autem insidiabatur illi et volebat occidere eum nec poterat
Mc 6.20
Herodes enim metuebat Iohannem sciens eum virum iustum et sanctum et custodiebat eum et audito eo multa faciebat et libenter eum audiebat
Mc 6.21
et cum dies oportunus accidisset Herodes natalis sui cenam fecit principibus et tribunis et primis Galilaeae
Mc 6.22
cumque introisset filia ipsius Herodiadis et saltasset et placuisset Herodi simulque recumbentibus rex ait puellae pete a me quod vis et dabo tibi
Mc 6.23
et iuravit illi quia quicquid petieris dabo tibi licet dimidium regni mei
Mc 6.24
quae cum exisset dixit matri suae quid petam et illa dixit caput Iohannis Baptistae
Mc 6.25
cumque introisset statim cum festinatione ad regem petivit dicens volo ut protinus des mihi in disco caput Iohannis Baptistae
Mc 6.26
et contristatus rex propter iusiurandum et propter simul recumbentes noluit eam contristare
Mc 6.27
sed misso speculatore praecepit adferri caput eius in disco et decollavit eum in carcere
Mc 6.28
et adtulit caput eius in disco et dedit illud puellae et puella dedit matri suae
Mc 6.29
quo audito discipuli eius venerunt et tulerunt corpus eius et posuerunt illud in monumento
Mc 6.30
et convenientes apostoli ad Iesum renuntiaverunt illi omnia quae egerant et docuerant
Mc 6.31
et ait illis venite seorsum in desertum locum et requiescite pusillum erant enim qui veniebant et rediebant multi et nec manducandi spatium habebant
Mc 6.32
et ascendentes in navi abierunt in desertum locum seorsum
Mc 6.33
et viderunt eos abeuntes et cognoverunt multi et pedestre et de omnibus civitatibus concurrerunt illuc et praevenerunt eos
Mc 6.34
et exiens vidit multam turbam Iesus et misertus est super eos quia erant sicut oves non habentes pastorem et coepit docere illos multa
Mc 6.35
et cum iam hora multa fieret accesserunt discipuli eius dicentes desertus est locus hic et iam hora praeterivit
Mc 6.36
dimitte illos ut euntes in proximas villas et vicos emant sibi cibos quos manducent
Mc 6.37
et respondens ait illis date illis manducare et dixerunt ei euntes emamus denariis ducentis panes et dabimus eis manducare
Mc 6.38
et dicit eis quot panes habetis ite et videte et cum cognovissent dicunt quinque et duos pisces
Mc 6.39
et praecepit illis ut accumbere facerent omnes secundum contubernia super viride faenum
Mc 6.40
et discubuerunt in partes per centenos et per quinquagenos
Mc 6.41
et acceptis quinque panibus et duobus piscibus intuens in caelum benedixit et fregit panes et dedit discipulis suis ut ponerent ante eos et duos pisces divisit omnibus
Mc 6.42
et manducaverunt omnes et saturati sunt
Mc 6.43
et sustulerunt reliquias fragmentorum duodecim cofinos plenos et de piscibus
Mc 6.44
erant autem qui manducaverunt quinque milia virorum
Mc 6.45
et statim coegit discipulos suos ascendere navem ut praecederent eum trans fretum ad Bethsaidam dum ipse dimitteret populum
Mc 6.46
et cum dimisisset eos abiit in montem orare
Mc 6.47
et cum sero esset erat navis in medio mari et ipse solus in terra
Mc 6.48
et videns eos laborantes in remigando erat enim ventus contrarius eis et circa quartam vigiliam noctis venit ad eos ambulans super mare et volebat praeterire eos
Mc 6.49
at illi ut viderunt eum ambulantem super mare putaverunt fantasma esse et exclamaverunt
Mc 6.50
omnes enim eum viderunt et conturbati sunt et statim locutus est cum eis et dixit illis confidite ego sum nolite timere
Mc 6.51
et ascendit ad illos in navem et cessavit ventus et plus magis intra se stupebant
Mc 6.52
non enim intellexerant de panibus erat enim cor illorum obcaecatum
Mc 6.53
et cum transfretassent pervenerunt in terram Gennesareth et adplicuerunt
Mc 6.54
cumque egressi essent de navi continuo cognoverunt eum
Mc 6.55
et percurrentes universam regionem illam coeperunt in grabattis eos qui se male habebant circumferre ubi audiebant eum esse
Mc 6.56
et quocumque introibat in vicos vel in villas aut civitates in plateis ponebant infirmos et deprecabantur eum ut vel fimbriam vestimenti eius tangerent et quotquot tangebant eum salvi fiebant

 

 

Arcanum Newspapers
Arcanum Newspapers

See what the newspapers have said about this subject in the last 250 years!

Show me

Arcanum logo

Arcanum is an online publisher that creates massive structured databases of digitized cultural contents.

The Company Contact Press room

Languages