Mc 13

Full text search

Mc 13
Mc 13.1
et cum egrederetur de templo ait illi unus ex discipulis suis magister aspice quales lapides et quales structurae
Mc 13.2
et respondens Iesus ait illi vides has omnes magnas aedificationes non relinquetur lapis super lapidem qui non destruatur
Mc 13.3
et cum sederet in montem Olivarum contra templum interrogabant eum separatim Petrus et Iacobus et Iohannes et Andreas
Mc 13.4
dic nobis quando ista fient et quod signum erit quando haec omnia incipient consummari
Mc 13.5
et respondens Iesus coepit dicere illis videte ne quis vos seducat
Mc 13.6
multi enim venient in nomine meo dicentes quia ego sum et multos seducent
Mc 13.7
cum audieritis autem bella et opiniones bellorum ne timueritis oportet enim fieri sed nondum finis
Mc 13.8
exsurget autem gens super gentem et regnum super regnum et erunt terraemotus per loca et fames initium dolorum haec
Mc 13.9
videte autem vosmet ipsos tradent enim vos conciliis et in synagogis vapulabitis et ante praesides et reges stabitis propter me in testimonium illis
Mc 13.10
et in omnes gentes primum oportet praedicari evangelium
Mc 13.11
et cum duxerint vos tradentes nolite praecogitare quid loquamini sed quod datum vobis fuerit in illa hora id loquimini non enim estis vos loquentes sed Spiritus Sanctus
Mc 13.12
tradet autem frater fratrem in mortem et pater filium et consurgent filii in parentes et morte adficient eos
Mc 13.13
et eritis odio omnibus propter nomen meum qui autem sustinuerit in finem hic salvus erit
Mc 13.14
cum autem videritis abominationem desolationis stantem ubi non debet qui legit intellegat tunc qui in Iudaea sunt fugiant in montes
Mc 13.15
et qui super tectum ne descendat in domum nec introeat ut tollat quid de domo sua
Mc 13.16
et qui in agro erit non revertatur retro tollere vestimentum suum
Mc 13.17
vae autem praegnatibus et nutrientibus in illis diebus
Mc 13.18
orate vero ut hieme non fiant
Mc 13.19
erunt enim dies illi tribulationes tales quales non fuerunt ab initio creaturae quam condidit Deus usque nunc neque fient
Mc 13.20
et nisi breviasset Dominus dies non fuisset salva omnis caro sed propter electos quos elegit breviavit dies
Mc 13.21
et tunc si quis vobis dixerit ecce hic est Christus ecce illic ne credideritis
Mc 13.22
exsurgent enim pseudochristi et pseudoprophetae et dabunt signa et portenta ad seducendos si potest fieri etiam electos
Mc 13.23
vos ergo videte ecce praedixi vobis omnia
Mc 13.24
sed in illis diebus post tribulationem illam sol contenebrabitur et luna non dabit splendorem suum
Mc 13.25
et erunt stellae caeli decidentes et virtutes quae sunt in caelis movebuntur
Mc 13.26
et tunc videbunt Filium hominis venientem in nubibus cum virtute multa et gloria
Mc 13.27
et tunc mittet angelos suos et congregabit electos suos a quattuor ventis a summo terrae usque ad summum caeli
Mc 13.28
a ficu autem discite parabolam cum iam ramus eius tener fuerit et nata fuerint folia cognoscitis quia in proximo sit aestas
Mc 13.29
sic et vos cum videritis haec fieri scitote quod in proximo sit in ostiis
Mc 13.30
amen dico vobis quoniam non transiet generatio haec donec omnia ista fiant
Mc 13.31
caelum et terra transibunt verba autem mea non transibunt
Mc 13.32
de die autem illo vel hora nemo scit neque angeli in caelo neque Filius nisi Pater
Mc 13.33
videte vigilate et orate nescitis enim quando tempus sit
Mc 13.34
sicut homo qui peregre profectus reliquit domum suam et dedit servis suis potestatem cuiusque operis et ianitori praecipiat ut vigilet
Mc 13.35
vigilate ergo nescitis enim quando dominus domus veniat sero an media nocte an galli cantu an mane
Mc 13.36
ne cum venerit repente inveniat vos dormientes
Mc 13.37
quod autem vobis dico omnibus dico vigilate

 

 

Arcanum Newspapers
Arcanum Newspapers

See what the newspapers have said about this subject in the last 250 years!

Show me

Arcanum logo

Arcanum is an online publisher that creates massive structured databases of digitized cultural contents.

The Company Contact Press room

Languages