Ez 13

Full text search

Ez 13
Ez 13.1
וַיְהִי דְבַר־יְהוָה אֵלַי לֵאמֹר׃
Ez 13.2
בֶּנ־אָדָם הִנָּבֵא אֶל־נְבִיאֵי
יִשְׂרָאֵל הַנִּבָּאִים וְאָמַרְתָּ לִנְבִיאֵי
מִלִּבָּם שִׁמְעוּ דְּבַר־יְהוָה׃
Ez 13.3
כֹּה אָמַר אֲדֹנָי יְהוִה הוֺי
עַל־הַנְּבִיאִים הַנְּבָלִים אֲשֶׁר
הֹלְכִים אַחַר רוּחָם וּלְבִלְתִּי
רָאוּ׃
Ez 13.4
כְּשֻׁעָלִים בָּחֳרָבוֺת נְבִיאֶיךָ
יִשְׂרָאֵל הָיוּ׃
Ez 13.5
לֹא עֲלִיתֶם בַּפְּרָצוֺת וַתִּגְדְּרוּ
גָדֵר עַל־בֵּית יִשְׂרָאֵל לַעֲמֹד
בַּמִּלְחָמָה בְּיֺום יְהוָה׃
Ez 13.6
חָזוּ שָׁוְא וְקֶסֶם כָּזָב הָאֹמְרִים
נְאֻמ־יְהוָה וַיהוָה לֹא שְׁלָחָם
וְיִחֲלוּ לְקַיֵּם דָּבָר׃
Ez 13.7
הֲלוֺא מַחֲזֵה־שָׁוְא חֲזִיתֶם וּמִקְסַם
כָּזָב אֲמַרְתֶּם וְאֹמְרִים נְאֻמ־יְהוָה
וַאֲנִי לֹא דִבַּרְתִּי׃ ס
Ez 13.8
לָכֵן כֹּה אָמַר אֲדֹנָי יְהוִה
יַעַן דַּבֶּרְכֶם שָׁוְא וַחֲזִיתֶם
כָּזָב לָכֵן הִנְנִי אֲלֵיכֶם נְאֻם
אֲדֹנָי יְהוִה׃
Ez 13.9
וְהָיְתָה יָדִי אֶל־הַנְּבִיאִים
הַחֹזִים שָׁוְא וְהַקֹּסְמִים כָּזָב
בְּסוֺד עַמִּי לֹא־יִהְיוּ וּבִכְתָב
בֵּית־יִשְׂרָאֵל לֹא יִכָּתֵבוּ וְאֶל־דְמַת
יִשְׂרָאֵל לֹא יָבֹאוּ וִידַעְתֶּם
כִּי אֲנִי אֲדֹנָי יְהוִה׃
Ez 13.10
יַעַן וּבְיַעַן הִטְעוּ אֶת־עַמִּי
לֵאמֹר שָׁלוֺם וְאֵין שָׁלוֺם וְהוּא
בֹּנֶה חַיִץ וְהִנָּם טָחִים אֹתוֺ
תָּפֵל׃
Ez 13.11
אֱמֹר אֶל־טָחֵי תָפֵל וְיִפֹּל הָיָה
גֶּשֶׁם שׁוֺטֵף וְאַתֵּנָה אַבְנֵי
אֶלְגָּבִישׁ תִּפֹּלְנָה וְרוּחַ סְעָרוֺת
תְּבַקֵּעַ׃
Ez 13.12
וְהִנֵּה נָפַל הַקִּיר הֲלוֺא יֵאָמֵר
אֲלֵיכֶם אַיֵּה הַטִּיחַ אֲשֶׁר טַחְתֶּם׃
ס
Ez 13.13
לָכֵן כֹּה אָמַר אֲדֹנָי יְהוִה
וּבִקַּעְתִּי רוּחַ־סְעָרוֺת בַּחֲמָתִי
וְגֶשֶׁם שֹׁטֵף בְּאַפִּי יִהְיֶה וְאַבְנֵי
אֶלְגָּבִישׁ בְּחֵמָה לְכָלָה׃
Ez 13.14
וְהָרַסְתִּי אֶת־הַקִּיר אֲשֶׁר־טַחְתֶּם
תָּפֵל וְהִגַּעְתִּיהוּ אֶל־הָאָרֶץ
וְנִגְלָה יְסֹדוֺ וְנָפְלָה וּכְלִיתֶם
בְּתוֺכָהּ וִידַעְתֶּם כִּי־אֲנִי
יְהוָה׃
Ez 13.15
וְכִלֵּיתִי אֶת־חֲמָתִי בַּקִּיר וּבַטָּחִים
אֹתוֺ תָּפֵל וְאֹמַר לָכֶם אֵין
הַקִּיר וְאֵין הַטָּחִים אֹתוֺ׃
Ez 13.16
נְבִיאֵי יִשְׂרָאֵל הַנִבְּאִים אֶל־יְרוּשָׁלִַם
וְהַחֹזִים לָהּ חֲזֺון שָׁלֹם וְאֵין
שָׁלֹם נְאֻם אֲדֹנָי יְהֹוִה׃ ף
Ez 13.17
וְאַתָּה בֶנ־אָדָם שִׂים פָּנֶיךָ
אֶל־בְּנֺות עַמְּךָ הַמִּתְנַבְּאוֺת
מִלִּבְּהֶן וְהִנָּבֵא עֲלֵיהֶן׃
Ez 13.18
וְאָמַרְתָּ כֹּה־אָמַר אֲדֹנָי יְהוִה
הוֺי לִמְתַפְּרוֺת כְּסָתוֺת עַל
כָּל־אַצִּילֵי יָדַי וְעֹשׂוֺת הַמִּסְפָּחוֺת
עַל־רֹאשׁ כָּל־קוֺמָה לְצוֺדֵד
נְפָשׁוֺת הַנְּפָשׁוֺת תְּצוֺדֵדְנָה
לְעַמִּי וּנְפָשׁוֺת לָכֶנָה תְחַיֶּינָה׃
Ez 13.19
וַתְּחַלֶּלְנָה אֹתִי אֶל־עַמִּי בְּשַׁעֲלֵי
שְׂעֹרִים וּבִפְתוֺתֵי לֶחֶם לְהָמִית
נְפָשׁוֺת אֲשֶׁר לֹא־תְמוּתֶנָה וּלְחַיֺּות
נְפָשׁוֺת אֲשֶׁר לֹא־חְיֶינָה בְּכַזֶּבְכֶם
לְעַמִּי שֹׁמְעֵי כָזָב׃ ס
Ez 13.20
לָכֵן כֹּה־אָמַר אֲדֹנָי יְהוִה
הִנְנִי אֶל־כִּסְּתוֺתֵיכֶנָה אֲשֶׁר
אַתֵּנָה מְצֹדְדוֺת שָׁם אֶת־הַנְּפָשׁוֺת
לְפֹרְחוֺת וְקָרַעְתִּי אֹתָם מֵעַל
זְרוֺעֹתֵיכֶם וְשִׁלַּחְתִּי אֶת־הַנְּפָשׁוֺת
אֲשֶׁר אַתֶּם מְצֹדְדוֺת אֶת־נְפָשִׁים
לְפֹרְחֹת׃
Ez 13.21
וְקָרַעְתִּי אֶת־מִסְפְּחֹתֵיכֶם וְהִצַּלְתִּי
אֶת־עַמִּי מִיֶּדְכֶן וְלֹא־יִהְיוּ
עוֺד בְּיֶדְכֶן לִמְצוּדָה וִידַעְתֶּן
כִּי־אֲנִי יְהוָה׃
Ez 13.22
יַעַן הַכְאוֺת לֵב־צַדִּיק שֶׁקֶר
וַאֲנִי לֹא הִכְאַבְתִּיו וּלְחַזֵּק
יְדֵי רָשָׁע לְבִלְתִּי־שׁוּב מִדַּרְכּוֺ
הָרָע לְהַחֲיֺתוֺ׃
Ez 13.23
לָכֵן שָׁוְא לֹא תֶחֱזֶינָה וְקֶסֶם
לֹא־תִקְסַמְנָה עוֺד וְהִצַּלְתִּי
אֶת־עַמִּי מִיֶּדְכֶן וִידַעְתֶּן
כִּי־אֲנִי יְהוָה׃

 

 

Arcanum Newspapers
Arcanum Newspapers

See what the newspapers have said about this subject in the last 250 years!

Show me

Arcanum logo

Arcanum is an online publisher that creates massive structured databases of digitized cultural contents.

The Company Contact Press room

Languages