Jes 47

Full text search

Jes 47
Jes 47.1
רְדִי וּשְׁבִי עַל־עָפָר בְּתוּלַת
בַּת־בָּבֶל שְׁבִי־לָאָרֶץ אֵינ־כִּסֵּא
בַּת־כַּשְׂדִּים כִּי לֹא תוֺסִיפִי
יִקְרְאוּ־לָך רַכָּה וַעֲנֻגָּה׃
Jes 47.2
קְחִי רֵחַיִם וְטַחֲנִי קָמַח גַּלִּי
צַמָּתֵך חֶשְׂפִּי־שֹׁבֶל גַּלִּי־שׁוֺק
עִבְרִי נְהָרוֺת׃
Jes 47.3
תִּגָּל עֶרְוָתֵך גַּם תֵּרָאֶה חֶרְפָּתֵך
נָקָם אֶקָּח וְלֹא אֶפְגַּע אָדָם׃
ס
Jes 47.4
גֺּאֲלֵנוּ יְהוָה צְבָאוֺת שְׁמוֺ
קְדוֺשׁ יִשְׂרָאֵל׃
Jes 47.5
שְׁבִי דוּמָם וּבֹאִי בַחֹשֶׁך בַּת־כַּשְׂדִּים
כִּי לֹא תוֺסִיפִי יִקְרְאוּ־לָך
גְּבֶרֶת מַמְלָכוֺת׃
Jes 47.6
קָצַפְתִּי עַל־עַמִּי חִלַּלְתִּי נַחֲלָתִי
וָאֶתְּנֵם בְּיָדֵך לֹא־שַׂמְתְּ לָהֶם
רַחֲמִים עַל־זָקֵן הִכְבַּדְתְּ עֻלֵּך
מְאֹד׃
Jes 47.7
וַתֹּאמְרִי לְעוֺלָם אֶהְיֶה גְבָרֶת
עַד לֹא־שַׂמְתְּ אֵלֶּה עַל־לִבֵּך
לֹא זָכַרְתְּ אַחֲרִיתָהּ׃ ס
Jes 47.8
וְעַתָּה שִׁמְעִי־זֺאת עֲדִינָה הַיֺּושֶׁבֶת
לָבֶטַח הָאֹמְרָה בִּלְבָבָהּ אֲנִי
וְאַפְסִי עוֺד לֹא אֵשֵׁב אַלְמָנָה
וְלֹא אֵדַע שְׁכוֺל׃
Jes 47.9
וְתָבֹאנָה לָּך שְׁתֵּי־אֵלֶּה רֶגַע
בְּיֺום אֶחָד שְׁכוֺל וְאַלְמֹן
כְּתֻמָּם בָּאוּ עָלַיִך בְּרֹב כְּשָׁפַיִך
בְּעָצְמַת חֲבָרַיִך מְאֹד׃
Jes 47.10
וַתִּבְטְחִי בְרָעָתֵך אָמַרְתְּ אֵין
רֹאָנִי חָכְמָתֵך וְדַעְתֵּך הִיא
שׁוֺבְבָתֶך וַתֹּאמְרִי בְלִבֵּך אֲנִי
וְאַפְסִי עוֺד׃
Jes 47.11
וּבָא עָלַיִך רָעָה לֹא תֵדְעִי
שַׁחְרָהּ וְתִפֹּל עָלַיִך הֹוָה לֹא
תוּכְלִי כַּפְּרָהּ וְתָבֹא עָלַיִך
פִּתְאֹם שׁוֺאָה לֹא תֵדָעִי׃
Jes 47.12
עִמְדִי־נָא בַחֲבָרַיִך וּבְרֹב כְּשָׁפַיִך
בַּאֲשֶׁר יָגַעַתְּ מִנְּעוּרָיִך אוּלַי
תּוּכְלִי הוֺעִיל אוּלַי תַּעֲרוֺצִי׃
Jes 47.13
נִלְאֵית בְּרֹב עֲצָתָיִך יַעַמְדוּ־נָא
וְיֺושִׁיעֻך 1 הָבְרוּ 2 הֹבְרֵי שָׁמַיִם
הַחֹזִים בַּכּוֺכָבִים מוֺדִיעִם
לֶחֳדָשִׁים מֵאֲשֶׁר יָבֹאוּ לָיִך׃
Jes 47.14
הִנֵּה הָיוּ כְקַשׁ אֵשׁ שְׂרָפָתַם
לֹא־יַצִּילוּ אֶת־נַפְשָׁם מִיַּד
לֶהָבָה אֵינ־גַּחֶלֶת לַחְמָם אוּר
לָשֶׁבֶת נֶגְדּוֺ׃
Jes 47.15
כֵּן הָיוּ־לָך אֲשֶׁר יָגָעַתְּ סֹחֲרַיִך
מִנְּעוּרַיִך אִישׁ לְעֶבְרוֺ תָּעוּ
אֵין מוֺשִׁיעֵך׃ ס

 

 

Arcanum Newspapers
Arcanum Newspapers

See what the newspapers have said about this subject in the last 250 years!

Show me

Arcanum logo

Arcanum is an online publisher that creates massive structured databases of digitized cultural contents.

The Company Contact Press room

Languages