Jes 34

Full text search

Jes 34
Jes 34.1
קִרְבוּ גֺויִם לִשְׁמֹעַ וּלְאֻמִּים
הַקְשִׁיבוּ תִּשְׁמַע הָאָרֶץ וּמְלֹאָהּ
תֵּבֵל וְכָל־צֶאֱצָאֶיהָ׃
Jes 34.2
כִּי קֶצֶף לַיהוָה עַל־כָּל־הַגֺּויִם
וְחֵמָה עַל־כָּל־צְבָאָם הֶחֱרִימָם
נְתָנָם לַטָּבַח׃
Jes 34.3
וְחַלְלֵיהֶם יֻשְׁלָכוּ וּפִגְרֵיהֶם
יַעֲלֶה בָאְשָׁם וְנָמַסּוּ הָרִים
מִדָּמָם׃
Jes 34.4
וְנָמַקּוּ כָּל־צְבָא הַשָּׁמַיִם וְנָגֺלּוּ
כַסֵּפֶר הַשָּׁמָיִם וְכָל־צְבָאָם יִבּוֺל
כִּנְבֹל עָלֶה מִגֶּפֶן וּכְנֺבֶלֶת
מִתְּאֵנָה׃
Jes 34.5
כִּי־רִוְּתָה בַשָּׁמַיִם חַרְבִּי הִנֵּה
עַל־אֱדוֺם תֵּרֵד וְעַל־עַם חֶרְמִי
לְמִשְׁפָּט׃
Jes 34.6
חֶרֶב לַיהוָה מָלְאָה דָם הֻדַּשְׁנָה
מֵחֵלֶב מִדַּם כָּרִים וְעַתּוּדִים
מֵחֵלֶב כִּלְיֺות אֵילִים כִּי
זֶבַח לַיהוָה בְּבָצְרָה וְטֶבַח
גָּדוֺל בְּאֶרֶץ אֱדוֺם׃
Jes 34.7
וְיָרְדוּ רְאֵמִים עִמָּם וּפָרִים
עִמ־אַבִּירִים וְרִוְּתָה אַרְצָם
מִדָּם וַעֲפָרָם מֵחֵלֶב יְדֻשָּׁן׃
Jes 34.8
כִּי יֺום נָקָם לַיהוָה שְׁנַת
שִׁלּוּמִים לְרִיב צִיֺּון׃
Jes 34.9
וְנֶהֶפְכוּ נְחָלֶיהָ לְזֶפֶת וַעֲפָרָהּ
לְגָפְרִית וְהָיְתָה אַרְצָהּ לְזֶפֶת
בֹּעֵרָה׃
Jes 34.10
לַיְלָה וְיֺומָם לֹא תִכְבֶּה לְעוֺלָם
יַעֲלֶה עֲשָׁנָהּ מִדּוֺר לָדוֺר
תֶּחֱרָב לְנֵצַח נְצָחִים אֵין עֹבֵר
בָּהּ׃
Jes 34.11
וִירֵשׁוּהָ קָאַת וְקִפּוֺד וְיַנְשׁוֺף
וְעֹרֵב יִשְׁכְּנוּ־בָהּ וְנָטָה עָלֶיהָ
קַו־תֹהוּ וְאַבְנֵי־בֹהוּ׃
Jes 34.12
חֹרֶיהָ וְאֵינ־שָׁם מְלוּכָה יִקְרָאוּ
וְכָל־שָׂרֶיהָ יִהְיוּ אָפֶס׃
Jes 34.13
וְעָלְתָה אַרְמְנֺתֶיהָ סִירִים קִמּוֺשׂ
וָחוֺחַ בְּמִבְצָרֶיהָ וְהָיְתָה נְוֵה
תַנִּים חָצִיר לִבְנֺות יַעֲנָה׃
Jes 34.14
וּפָגְשׁוּ צִיִּים אֶת־אִיִּים וְשָׂעִיר
עַל־רֵעֵהוּ יִקְרָא אַכְ־שָׁם הִרְגִּיעָה
לִּילִית וּמָצְאָה לָהּ מָנֺוחַ׃
Jes 34.15
שָׁמָּה קִנְּנָה קִפּוֺז וַתְּמַלֵּט וּבָקְעָה
וְדָגְרָה בְצִלָּהּ אַכְ־שָׁם נִקְבְּצוּ
דַיֺּות אִשָּׁה רְעוּתָהּ׃
Jes 34.16
דִּרְשׁוּ מֵעַל־סֵפֶר יְהוָה וּקְרָאוּ
אַחַת מֵהֵנָּה לֹא נֶעְדָּרָה אִשָּׁה
רְעוּתָהּ לֹא פָקָדוּ כִּי־פִי הוּא
צִוָּה וְרוּחוֺ הוּא קִבְּצָן׃
Jes 34.17
וְהוּא־הִפִּיל לָהֶן גֺּורָל וְיָדוֺ
חִלְּקַתָּה לָהֶם בַּקָּו עַד־עוֺלָם
יִירָשׁוּהָ לְדוֺר וָדוֺר יִשְׁכְּנוּ־בָהּ׃
ס

 

 

Arcanum Newspapers
Arcanum Newspapers

See what the newspapers have said about this subject in the last 250 years!

Show me

Arcanum logo

Arcanum is an online publisher that creates massive structured databases of digitized cultural contents.

The Company Contact Press room

Languages